На почетокот на април се очекува повеќе сонце и потопло време со помалку облаци и ветер. Овој тренд на постепено зголемување на температурите на воздухот ќе продолжи и во текот на целиот месец, но и понатаму ќе има периоди со променливи временски услови, вообичаени за април, велат од Управата за хидрометеоролошки работи (УХМР).
Оттаму информираат дека снежната покривка во западните планински области во Македонија и температурните контрасти не ја исклучуваат можноста за повремени локални влијанија на времето со појава на облаци, ветер и врнежи.
– Затоплувањето во почетокот на април во комбинација со топењето на снегот и евентуалните врнежи можат да предизвикаат и локални излевања на реките во западна Македонија, велат од УХМР.
Анализите на експертите по метеорологија покажуваат дека од крајот на април кон мај ќе продолжи трендот на пораст на дневните температури, т.е. сонце во комбинација со можна попладневна атмосферска нестабилност и влажни процеси во атмосферата, посебно во текот на мај.
Во првата половина на летото се предвидува поголемо влијание на суптропскиот појас на висок притисок и циклуси со поинтензивна топлина во јужна Италија и во јужниот дел на Балканот.
Според сезонските прогнози на Европскиот центар, отстапувањата на просечните температури во приземниот слој на атмосферата и на планините, во пртстојната сезона пролет-лето би биле повисоки за околу 0.5-1.0 °C. Во првиот тримесечен период април-мај-јуни нема отстапување во однос на врнежите, додека во јули-август-септември се очекува околу 50 милиметри помала, вкупна сума на врнежи во однос на просечните за овој период.
Според експертите од УХМР вомај ситуацијата е малку поинаква. Се предвидува сосема мало негативно отстапување на температурите. Во наредните месеци од јуни-септември би се движеле во рамките на климатскиот просек. Во однос на врнежите, не се предвидуваат отстапувања, додека во текот на мај можен е благ пораст на аномалијата на врнежите од климатскиот просек, информираат од УХМР.
Јуни се очекува да биде посув. Сличен тренд како во јуни се предвидува и во јули додека додека август и септември би биле во границите на просечниот, велат експертите по метеорологија.
Во однос на режимот на температурите се очекува позитивно отстапување во интервалот од 1-2 °C во месеците април и мај, додека овој центар предвидува и повисоки температури во однос на климатскиот просек за 2-3 °C во текот на летото во месеците јуни и јули.
– Според истиот извор, август ќе биде топол, но со поблаго позитивно отстапување на температурите, додека септември во рамките на просекот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
