Тринаесет модни ревии, презентации на нови марки и забава под маски се само дел од програмата на тринаесеттиот Моден викенд Скопје, кој од денеска до 4 април ќе се одржи под мотото „Да живеат осумдесеттите!“.
Ревискиот дел, кој ќе се одржува во салонот „Порше Македонија“, вечерва го отвора дизајнерката Росица Мршиќ со колекција инспирирана од женските ликови од портретите на сликарот Амадео Модиљани.
Потоа се ревиите на дизајнерките Олгица Ѓоргиева со парчиња облека што ги следат светските модни трендови споени со нејзиниот веќе познат стил. Силвија Михајловска (модно ателје „Алшар“), пак, ќе се претстави со колекцијата наречена „Сакура ин фужн“, а ќе биде надополнета со рачно изработен накит дизајниран од Елена Ристовска инспириран од колецијата на Михајловска.
Веднаш по ревиите во „Порше Македонија“ ќе следува и забава под маски со музички хитови од осумдесеттите.
Вториот ден ќе започне со групна ревија на студентите од Факултетот за арт и дизајн при Европскиот универзитет на РМ, на тема „Шари и текстури“. Првпат на настанот ќе се претстави дизајнерката Тијана Младеновиќ од Србија, која доаѓа преку соработката на Моден викенд Скопје со српската модна организација „БАФЕ“. Следуваат ревиите на модната куќа „Линеа“ и марката „Елези Париз“ чии креации ги потпишува дизајнерката Флора Елези од Париз. Елези, која има македонско потекло, дипломирала на престижниот универзитет „Сорбона“. За крај на втората вечер ќе биде презентирана колекцијата на Ирина Тошева поддржана, меѓу другите и од Министерството за култура на РМ. Колекцијата која Тошева ја изработи, во соработка со архитектот Никола Кунгуловски, ја екстрахира геометријата на највпечатливите везови од минатите столетија.
Последниот ревиски ден ќе го отвори групна модна ревија на дизајнерки од Косово. Место Флутура Дедиња на 3 април во 18 часот ќе биде презентирана новата колекција на Дренуша Џара наречена „Голеден ера“ .
Со свои модели гостува и Јилка Брада, која пред македонската публика ќе се претстави првпат.
Најновата колекција на „ЈЗЈ бај Златко Јовановски“ која го носи името „ЈСЈ’С кингдом“ веднаш по ревијата ќе биде пратена во Лондон каде што креациите ќе бидат достапни во салон од кој најчесто креации изнајмуваат ВИП личности.
Третиот ден ќе може да се проследи и „Бохо шик“ колекцијата на дизајнерот Никола Петровски со која годинава одбележува 20 години од својата прва ревија и ревијата на „СИГМА џулери“ (SIGMA Jewelry) кои се познати по уникатниот накит.
Тридневното ревиско случување ќе го затвори познатата дизајнерка Лидија Георгиева.
Новото ателје на Мила Кадриу, кое требаше да се отвори на четвртиот последен ден на Модниот викенд е одложено од технички причини. Овој настан се очекува да се одржи неколку дена подоцна.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
