Во Измир: Театарот за деца и младинци поздравен со оваации и долготрајни аплаузи

Со овации и долготрајни аплаузи биле поздравени актерите на Театарот за деца и младинци, кои со претставата „Бескрајните соништа“ ја освоија публиката на најголемиот светски фестивал за детски и куклени претстави во Измир, Турција, информираат од Театар за деца и младинци.

„Во периодот од деветти до 14 март Театарот за деца и младинци, забележа голем успех на овој исклучително квалитетен фестивал, на кој учествуваа 52 професионални театри за деца. Публика на фестивалот со воодушевување ги проследи сите четири изведби на претставата „Бескрајни соништа“, а исто така театарот, доби позитивни критики и покани од страна на менаџери на други светски фестивали за учество во текот на оваа и идната година“ се вели во соопштението од Театарот за деца и младинци.

Оваа претстава е направена со цел да се одбележи 20-годишниот јубилеј на Театарот за Деца и Младинци. Целта беше низ една претстава да се прикажат сите видови и типови на кукли што досега продефилирале во куклените претстави на Театарот. Претставата нема класична приказна, поделена е во неколку сцени кои можат да стојат и како посебни целини, споени со интересни промени од сцена во сцена. Во услови кога текстот е незначителен доминираат добро познати музички мотиви. Начинот на кој актерите формираат со најразлични предмети секакви форми е магичен и недофатлив за секое дете.

Претставата е за сите возрасти. „Бескрајни соништа“ во 2013 година е наградена на Суботичкиот Фестивал „ЛУТФЕСТ“ со престижната награда за оригиналност и фантазија.

Во преставата играат: Татјана Павловска Кочовска, Ана Левајковиќ-Бошков, Драган Довлев, Владимир Лазовски, Предраг Павловски, Марија Ѓорѓијовска, Наташа Петровиќ, Мики Анчевски, Ненад Митевски и Мартин Јорданоски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.