Со изложбата на фотографии „Љуѓе“ пред три години, Јован Куциновски раскажа многу успешна приказна преку ликовите на фотографиите, беше херој на денот кога излезе на плоштадот во Охрид и свиреше на гитарата колку што го држеа прстите за средства кои ги донираше за помош на Општината Новаци, настрадана во поплавите минатата година, компонира и преработува музика, а поводот за нашиот разговор е неговата најнова изложба на фотографии…
Изложбата „Фабриге зихт“ (farbige Sicht), која деновиве е пред очите на јавноста е Ваша втора тематска изложба. Што донесува и како настана?
Куциновски: Изложбата се состои од 23 пејзажи сите инспирирани и сите насликани во Швајцарија, во областа Граубунден, каде што имав привилегија да престојувам три месеци. Благодарение на тоа што имав привилегија да престојувам на ова прекрасно место, ги создадов фотографиите што денеска се поставени на изложбата. Немав намера да ги изложам и главен „виновник“ за сето ова е Саша Шотаровски, кој инсистираше да ја направам и вторава изложба, бидејќи и првата изложба, која се случи во „Галерија 8“ во 2013 година, тој ја организираше. Тогаш се претставив со портрети, а овој пат се пејзажи.
Вашата прва изложба беше насловена „Љуѓе“ и се состоеше од портрети… Овојпат тоа се швајцарски пејзажи. Дали темата ве одбира Вас или Вие неа? Каков ви е начинот на работа?
Куциновски: За првата изложба на која фотографирав портрети имав убави луѓе околу мене кои спонтано ги фотографирав во текот на една година, а со пејзажите беше поинаку. Кај мене тоа е периодично. Зависи во каква средина ќе се најдам, така и творам. Во Швајцарија и да не сте фотограф и да не сте љубител на фотографија, самата природа ве тера да извадите мобилен телефон или апарат и да фотографирате бидејќи природата е прекрасна. Таму не ми паѓаше на ум да фотографирам ништо друго освен пејзажи. Тоа е највпечатливо. Тоа е исто како некој кога ќе дојде во Охрид и кога ќе види зајдисонце и не помислува да фотографира нешто друго освен да го фати моментот на зајдисонце. Така беше и со мене во Швајцарија. Насекаде бев опкружен со прекрасни пејзажи и на ум не ми паѓаше да фотографирам нешто друго освен тоа. Сѐ зависи од просторот и од времето во кое се наоѓам и така одлучувам што да фотографирам.
Фотографијата е силен медиум. Што претставува фотографијата за Вас? Како почнавте да се занимавате со неа?
Куциновски: Фотографијата за мене е многу интересна алатка и начин да одморам, искрено. Со фотографија се занимавам уште од средно училиште. Ми стана мошне интересно и почнав да се интересирам за сите техники, за композицискиот дел, за уметничкиот дел… Во секој случај е силен медиум, а денеска е сосема различно бидејќи се работи со дигитални апарати и ја нема магијата на апарат со филм, каде што фотографираш 32 фотографии, па ги развиваш и дури тогаш ќе видиш што си направил. Сега веднаш се сѐ гледа, па се бришат фотографиите што не ти се допаѓаат итн. Јас обично велам дека денес и да не си многу талентиран, ако си доволно упорен, со денешниве апарати ќе направиш добри фотографии. Кај мене се работи за пасија. Јас не фотографирам за да покажам колку прекрасни фотографии сум направил, или дека „измислувам топла вода“, туку напротив, ја чувствувам како начин да пренесам одредена приказна. За мене хобито прерасна во професија, бидејќи не сум изучувал професионално фотографија, а од музичка наобразба имам нижо музичко училиште и сето тоа го надградувам годиниве наназад само поради љубовта.
Што значи насловот на изложбата „Фабриге зихт“ (farbige Sicht)? И како настана концептот за изложбата?
Куциновски: „Фабриге зихт“ (Farbige Sicht) во превод значи „обоен поглед“ и искрено бев инспириран од еден постер кој висеше на ѕидот од канцеларијата во која работеше мајка ми. На него беше прикажано некое езеро во Женева и црква. Значи беше прикажан пејзаж во Швајцарија. Всушност, тоа беше период, можеби некој ќе се сети, кога сликите од бонбониери или календари на кои се претставени пејзажи се сечеа и се лепеа со селотејп на ѕидовите… Јас како дете често ја гледав таа слика кај мајка ми во канцеларија и тоа некако стана појдовна инспирација. Тоа е сеќавање од детството и некако се трудев поголемиот дел од фотографиите да наликуваат на овие кои ми беа врежани во сеќавањето од детството.
Апсолвент сте на студиите за филмска и телевизиска режија, но Ваша љубов се и фотографијата и музиката. Каде се сретнуваат фотографијата и музиката во творењето?
Куциновски: Се сретнуваат. Сите три ги комбинирам на интересен начин за мене и гледам да сум успешен. Сите тие работи, секоја поединечно, ме исполнуваат на различен начин и ме прават среќен. Магијата на фотографијата носи различна сатисфакција, филмот и телевизијата даваат друга сатисфакција, но морам да признаам дека сум многу поактивен во видеомонтажата отколку во режијата, која ја оставам за подоцнежните години. Сметам дека за филм треба голем ангажман, посветеност и зрелост кај еден човек.
Ако треба да изберете еден од овие медиуми за искажување на креативноста, кој би го одбрале?
Куциновски: Искрено, не би сакал да избирам, зашто не можам. Сите работи што ги работам во мојот живот ги работам со задоволство и не би можел да речам, овде сум најдобар… Сметам дека за мене не важи изреката „Работи една работа и биди успешен во тоа“. Мене не ми е важно да сум успешен, туку да бидам среќен и задоволен. Кога човек е среќен и задоволен со тоа што го работи, работата ја завршува со леснотија.
Дали подготвуваше некои нови проекти? Што да очекуваме во иднина… филм, изложба, музика?
Куциновски: Имам многу нови планови на сите полиња: музиката, фотографијата, на видео и на филм, но најбргу ќе се посветам на проектот за музиката. Наскоро повторно заминувам во Швајцарија каде што ќе поработам повеќе на музички план. Таму уметничката страна е послаба, државата и луѓето се насочени на механизација и правење пари, но мислам дека со мојата уметност ќе им дадам доза на балканска свежина бидејќи гледам дека им годи.
Разговараше: Невена Поповска
Фото: Александар Ивановски
(Текст објавен во 182. број на неделникот „Република“, 26.02.2016)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Поврзани вести
-
Брачен пар објавил фотографија од венчавката: Кога виделе што има на неа не можеле да си дојдат при себе
-
Им било судено: Маж нашол фотографија од сопругата сликана 11 години пред да се венчаат, се шокирал кога видел што има на неа
-
Подгорица имала клима уреди во 1939?
-
Сликале венчавка од соседниот покрив – кога ја погледнале подобро фотографијата, останале шокирани од глетката (фото)