Познатиот македонски поет Михаил Ренџов во поетската едиција на скопски Макавеј ја објави новата поетска книга „Издишки“.
Во препораката кон новата поетска книга на Ренџов, поетот и литературен критичар Бранко Цветкоски истакнува:
„Поетот Михаил Ренџов е веќе меѓу иконите на македонската современа поезија. Нежниот и емотивен лиричар со новата книга со наслов „Издишки“ јасно напомнува дека се посветува на нова тема која го потенцира и го става во поетска разработка залезот на човековиот живот.
Македонскиот лиричар од прв ранг многу лесно се шета по бранувањата на душата и по секавичните изблици на убавината во се што ќе допре – во размислата за времето што одминува, во погледот кон липата што катапролет разубавува, во длабочината на тупотот на срцето кое како да ја мери вечноста, во дијалогот со митската поетеса Сафо, во роморот на чешмата, во гласот божествен што тихум се дослушнува секој ден… Оваа книга на Ренџов пленува со лежерноста на опсервацијата и со леснотијата на извлекувањето на поентите.
Како што е познато Ренџов е автор на дваесетина поетски книги, неколку книги раскази, носител е на врвни македонски и меѓународни поетски награди, негови книги се преведувани на десетина светски јазици.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
