Диего де Бреа, Александар Баргман и Андраш Урбан ќе режираат во Битолскиот театар

Режисерите Диего де Бреа од Словенија, Александар Баргман од Русија и Андраш Урбан од Србија повторно ќе работат на театарски проекти во Битола.

Де Бреа, кој е познат по режијата на „Отело“, годинава ќе ја режира претставата „Разбојници“ од Фридрих Шилер, Русинот Баргман, кој ја режираше претставата „Иванов“, овој пат ќе го подготвува авторскиот проект „Другари“, а гостинот од Суботица Андраш Урбан, кој во Битола остави силен впечаток со „Хамлет машина“, годинава ќе ја режира претставата „Доктор Фауст“ од Кристофер Марлоу.

– Министерството за култура годинава во Битола ќе финансира пет театарски премиери. Според националната програма за култура поддржана е нашата идеја за повторно гостување на три режисери од странство што оставија силен акцент во нашиот театар. Повод за нивното повторно гостување во Битола е нивниот директен придонес за меѓународна афирмација на нашиот театар и тоа што обезбедија учество на нашиот театар на повеќе сцени во Европа, истакна Валентин Светозарев, директор на НУ Народен театар-Битола.

Покрај со тројцата режисери од странство, битолските актери во 2016 година ќе работаат и со режисерите од матичната куќа, односно со Љупчо Ѓоргиевски, кој веќе ја подготвува претставата „Кралски игри“, и со Јован Ристовски и Ангелчо Илиевски, кои ги подготвуваат сонетите од Шекспир.

– Добивме поддршка од Министерството за култура и за организација на меѓународниот „Битола Шекспир фестивал“, која за разлика од минатите години овој пат  е поголема.  Шекспировите дела веќе се голем императив за театрите во Македонија и за нас тоа е голема сатисфакција. Инаку, во пресрет  на најновото фестивалско издание, потврден е интересот за гостување во Битола на театри од Израел, САД, Русија, Полска, Србија и, најверојатно, од Иран – посочи Светозарев.

Од Битолскиот театар посочија и дека со поддршка на Министерството за култура по подолго време во целост ќе бидат реконструирани шминкерниците.