Хан и дефинитивно во петок доаѓа во Скопје

Еврокомесарот за преговори за проширување Јоханес Хан и дефинитивно ќе ја посети Република Македонија во петок (15ти јануари), јави дописникот на МИА од Брисел.

Портпаролката на Европската комисија, Маја Коцијанчич, за МИА го потврди доаѓањето на Хан во Скопје во петок, каде како што претходно таа соопшти, тој ќе разговара со сите засегнати страни околу спроведувањето на политичкиот договор од 2 јуни/15 јули што стави крај на политичката криза во земјата.

-Комесарот на Европската унија Јоханес Хан ќе го посети Скопје на 15ти јануари- изјави портпаролката Коцијанчич.

Како што е познато, уште пред Нова година, еврокомесарот Хан испрати писмо до четирите најголеми политички партии во Македонија (ВМРОДПМНЕ, СДСМ, ДУИ и ДПА) дека планира на почетокот на овој месец да ја посети македонската држава, со цел да направи увид во спроведувањето на договорот од Пржино, чија крајна цел ќе биде одржување на предвремени парламентарни избори на 24 април. Доаѓањето на Хан во петок во Македонија, пак, се очекува да се поклопи со изборот на техничка Влада со нов привремен премиер, чија единствена задача ќе биде спроведување на изборите на 24 април оваа година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.