Европската комисија ги прекори Грција, Италија и Хрватска дека не се доволно ефикасни во собирањето дигитални отпечатоци од кандидатите за азил и нелегалните емигранти, кои пристигнуваат на нивна територија, пренесоа француските медиуми.
Европската комисија на трите земји им испратила „писма со покана за доброволно исполнување“, кои претставуваат прва фаза од процедурата за санкционирање на прекршителите, што можат да завршат со тужење пред Судот на ЕУ.
Европската комисија смета дека трите земји не ги применуваат правилно обврските да снимаат отпечатоци од кандидатите за азил и од нелегалните мигранти и во рок од 72 часа да ги предадаваат во Европскиот систем за автоматизирана идентификација на отпечатоците од прсти (Евродак).
Европската комисија административните писма на овие три држави им ги испратила уште во октомври. Два месеца подоцна проблемите не беа ефикасно решени, се посочува во соопштение на ЕК.
По поканата за доброволно исполнување овие три земји имаат рок од два месеца да одговорат на барањата.
Според правилата на ЕУ, земјите во кои кандидатите за азил прво пристигнале имаат обврска да ги регистрираат мигрантите и да ги обработат нивните барања.
За да им олесни на Грција и Италија, земјите кои најмногу се на ударот на вонредниот мигрантски прилив, ЕУ создаде систем за „релокализација“, што предвидува распределување на кандидатите за азил во рамки на ЕУ. Во замена за ова, ЕУ од Грција и Италија бара точна регистрација на кандидатите за азил.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
