Британската служба за електронско разузнавање Центар за владини комуникации (GCHQ) за првпат призна дека преземала хакерски напади врз компјутери, објави Фајненшал тајмс.
Признавањето е изнудено на суд од интернет компании и активисти кои поднесоа тужба против активностите на службата. Тужбата ја поднесоа седум интернетпровајдери и невладина организација Прајваси интернешнал против службата за електронско разузнавање и Министерството за надворешни работи во Велика Британија, поради хакерски акции во државата и странство.
Во октомври поранешниот соработник на американското разузнавање Едвард Сноуден во интервју за британски медиуми нагласи дека тој Центар е способен да контролира смартфони без знаење на сопственикот претворајќи ги во средства за следење. Станува збор за инсталирање шпионски софтвер.
Сноуден рече дека Центарот за владини комуникации и американската НСА соработуваат и инвестирале значителни средства во технологии за следење преку смартфони дури и кога се исклучени. Според Сноуден, разузнавачките служби може да следат кому му се јавувате, да го снимаат целиот разговор, какви пораки пишувате, кои сајтови ги посетувате и каде користите бежичен интернет.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
