Директорот на МКЦ ги кани сите на полн пансион во хотел „Синедејс“

Златко Стевковски, директор на Младинскиот културен центар (МКЦ), организатор на 14. издание на Фестивалот на европски филм „Синедејс“ облече брендирана маичка со логото на Фестивалот и на комплексот факултети кај Бит Пазар меѓу студентите ја подели програмата на „Синедејс“.

„Хотел Синедејс нуди полн пансион од 12 до 21 ноември” е најавата за годинешниот Фестивал. На филмското мени има повеќе од стотина филмови, селектирани во неколку програми, а богата е и придружната програма со концерти, работилници, промоции и со панел дискусии.

Меѓу гостите на „Синедејс“ се актерите од годинешниов победник во Кан „Дипан” на Жак Одијар, а ќе присуствуваат и екипите на сите филмови од програмата на “СинеБалкан”.

Првпат на Фестивалот ќе се доделат две парични награди од по 5.000 евра за филови од официјалната и од „СинеБалкан” селекцијата.

Билетите чинат по 150 денари за проекциите во “Милениум”, 100 за во “Фросина” и слободен влез за во Џебното кино. За студентите влезницата ќе биде за 50 денари поевтина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.