Разрешен и обвинет: Потпретседателот се обидел да го убие претседателот на Малдиви

Ахмед Адиб, потпретседател на Малдиви

Пратениците во парламентот на Малдиви со големо мнозинство го разрешиле потпретседателот на земјата, против кого ќе биде поднесено обвинение за тероризам поради заговор за убиство на претседателот.

Ахмед Адиб е уапсен поради сомневање дека планирал убиство на претседателот Абдул Јамин во експлозија на неговата јахта што се случи на 28 септември. Против него е поднесено обвинение за предавство.

Во инцидентот се повредени неговата сопруга и уште две лица, а шефот на државата остана неповреден.

За предлогот за разрешување на потпретседателот никој не гласал против, додека членовите на опозициската партија биле воздржани.

Претседателот на Малдиви завчера прогласил вонредна состојба во државата, првично за период од 30 дена, со што на безбедносните сили им се даваат широки овластувања.

Абдул Ламин, кој дошол на власт во ноември 2013 година по спорните избори, е критикуван од меѓународната заедница која смета дека водел репресивна кампања против опозицијата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.