Потресна приказна: Штипјанец 10 години живеел во шума откако синовите го избркале од дома

Во напуштена куќа во шумата, без струја и без вода, речиси десет години живеел 60-годишниот Тоше Лазаров од Штип. Денеска беше згрижен во манастирот „Света Недела“, каде веќе се наоѓаат 15 бездомници, пренесува агенцијата Мета.

Лазаров станал бездомник откако починала неговата сопруга, а тој останал без работа од една од пропаднатите државни фирми. За несреќата да биде поголема, доживеал и мозочен удар. По излегувањето од болница, тој бил отфрлен од своите синови. Почнал да талка по храна и за покрив, по што наишол на напуштена викендичка во близина на Штип. Лазаров раскажува дека при тоа, често бил напаѓан од диви животни, за што сведочат белези од каснувања на диви свињи и на чакали.

Со интервенција на Центарот за социјални работи, Црвениот крст и на Општина Штип, Лазаров од денеска е во неформалниот прифатен центар за бездомници во „Света Недела“. Тој нема лична карта, воопшто не бил евидентиран во системот на државните институции.

Директорката на центарот, Наталија Панова, најави дека внесувањето во системот ќе биде првото што ќе го направат, по што ќе почне да добива и социјална помош.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.