Црногорскиот премиер Мило Ѓукановиќ во интервју за Хрватската радио-телевизија (ХРТ) ги оцени протестите на опозицискиот Демократски фронт во Подгорица како обид за дестабилизација на земјата.
За саботните немири во Подгорица, при што беа повредени 40 луѓе, тој ги обвини организаторите на протестот.
– Во еден момент, како што можевте да видите, тоа прерасна во отворено, брутално насилство, во обид за заземање на државните институции, значи имаше обид насилно да се урне власта поради промена на курсот на државната политика. Секако, полицијата мораше да одговори, а тоа е во согласност со Уставот и законот и со полициските овластувања во такви ситуации. Тоа беше обид за загрозување на уставниот поредок на Црна Гора, со јасна амбиција да дојде до насилна смена на власта и ревизија на стратешкиот правец на државната политика на Црна Гора – посочи Ѓукановиќ.
Тој истакна дека Демократскиот фронт не само што сака промена на власта, туку сака и суспензија на европскиот и евроатлантскиот пат на Црна Гора.
– Според мое длабоко уверување, сакаат да се поништат резултатите од демократскиот референдум од 2006 година, за да се елиминира можноста Црна Гора како независна држава сама да ја избира својата политика, и секако, да се врати во гравитациското поле на политика од соседството и од подалечни адреси, кои не само што сакаат да управуваат со Црна Гора, туку и со регионот -наведе Ѓукановиќ
Тој додаде дека нема сомнеж дека Русија имала, и понатаму има, активна улога во антивладините протести.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
