Премиерот Груевски во посета на Шпанија

Премиерот Никола Груевски од денеска ќе престојува во дводневна политичко­-економска посета на Шпанија.

Во Мадрид, премиерот Груевски ќе учествува на Конгресот на Европската народна партија, кој е поделен во два дела. На првиот учесниците ќе разговараат за актуелните предизвици на европскиот континент, економијата и потенцијалите за пораст, одржливиот регионален развој и отворањето нови работни места, развојот на информатичкото општество и технологиите, а ќе се дебатира и за предизвикот со илегалните емигранти и за развојот на Eвропската унија и европската политика на интеграција.

Предвиден е и дел каде што ќе се обраќаат шефовите на влади што се членки на Европската народна партија, при што ќе се обрати и премиерот Груевски.

Вториот статутарен дел од конгресот во Мадрид, информираат од владината прес­-служба, е посветен на избор за претседател на Европската народна партија, потпретседатели и генерален секретар на Европската народна партија.

На Конгресот во Мадрид се очекува да бидат присутни и германската канцеларка Ангела Меркел, премиерот на Шпанија, Маријано Рахој, премиерот на Унгарија, Виктор Орбан, премиерот на Португалија, Педро Пасос Коело, премиерот на Ирска, Енда Кени, премиерката на Летонија, Лаимдота Страујума, претседателот на Европската комисија Жан Клод Јунер и претседателот на Европскиот совет Доналд Туск.

Во рамки на дводневниот престој на Мадрид, премиерот Груевски ќе присуствува и на бизнис-форум, којшто се реализира во организација на Стопанската комора на Мадрид. На форумот ќе бидат презентирани можностите за инвестирање во Македонија и потенцијалите за економска соработка и развој на економските односи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.