Издавачката куќа „Феникс“ најави нов проект посветен на најмладите читатели – едицијата „Детски класици“, која ќе ја промовира на Саемот на книгата од 9 до 15 април.
Почнувајќи од овој месец, секој нареден месец ќе бидат објавувани по две најпопуларни, најпознати и најпривлечни книги од детските класици, како Јакоб и Вилхелм Грим, Ханс Кристијан Андерсен, Александар Сергеевич Пушкин, Шарл Перо, Е.Т.А. Хофман, А.А. Милн, Хју Лофтинг, Џорџ Лобачев, Е.Р. Бароуз, Марк Твен, Виктор Иго, Луис Керол… Цената на изданијата од едицијата „Детски класици“ ќе се движи од 100 до 200 денари.
Во својата издавачка продукција „Феникс“ посветува внимание и на најмладите читатели и за 20 години има објавено повеќе од 1.000 изданија за деца и за млади (боенки, сликовници, лектири за основно и за средно образование, енциклопедии, речници и разговорници, прирачници). Во „Феникс“ активно работи Креативниот центар за деца и за млади, се организира традиционален фестивал на детската книга, се распишуваат и реализираат наградни конкурси, а заедно со Фондацијата „Македонија презент“ овој издавач ја доделува и наградата „Ана Франк“.
Оваа меѓународна награда за литература за деца и млади по четврти пат ќе биде доделена на претстојниот Саем на книгата. Добитници за 2013 се писателот Дејан Алексиќ од Србија, писателката и хуманист Катја Ерменкова од Бугарија и проф. д-р Виолета Димова од Македонија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
