Град Скопје почна со градежните работи за реконструкција на пешачката и велосипедска патека по должината на булеварот „Илинден“, на потегот од крстосницата со улицата „Љубљанска“ до цвеќарницата кај Матично.
Со овој зафат, постојната и многу оштетена пешачка и велосипедска патека ќе се реконструира и прошири на вкупна должина од 2.300 метри. По реконструкцијата, ќе се формира пешачка патека со ширина од 2 метра и велосипедска двонасочна патека со ширина од 2,5 метри. Површината ќе се покрие со асфалт, а ќе се наместат и нови рабници. За непречен влез и излез од крстосниците, ќе се изведат рампи за непречено движење, а патеката ќе се обележи со соодветна хоризонтална и вертикална сигнализација.
На реконструкција на пешачката и велосипедска патека ќе работат екипите на ЈП „Улици и патишта“. Градежните работи треба да завршат до крајот на ноември, годинава. За овој зафат Градот Скопје ќе потроши околу 8,5 милиони денари.
Оваа пешачко-велосипедска патека е дел од најавената рута 1 од обемниот проект на Град Скопје за подобрување на велосипедската инфраструктура во Скопје и за зголемување на безбедноста во сообраќајот „СКОПЈЕ ВЕЛОГРАД 2017“.
– Со проектот „СКОПЈЕ ВЕЛОГРАД 2017“ во градот ќе се оформат четири главни велосипедски рути кои ќе се протегаат во насока исток – запад и 7 конектори кои ќе се протегаат во насока север – југ и тоа: рута 1 – која ќе ги поврзе Гази Баба-Центар и Карпош, рута 2 – која ќе ги поврзе Аеродром–Центар-Карпош со Ѓорче Петров, рута 3 – која ќе ги поврзе Кисела Вода-Центар и Карпош и рута 4 – која ќе ги поврзе Бутел-Чаир со Центар, изјави градоначалникот Коце Трајановски.
Тој посочи дека со овој проект до 2017 година ќе ќе се реконструираат вкупно 51 километар велосипедски патеки.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
