Буџетот е во добра кондиција и има одлични остварувања во првите осум месец од годината. Приходите заклучно со 18 септември 2015 година се над очекувањата со раст од 12,9 проценти во однос на истиот период лани.
Ова го истакна вицепремиерот и министер за финансии Зоран Ставрески денеска на собраниската седница посветена на пратенички прашања.
Додаде дека заклучно со 18 септември вкупните приходи се реализирани со 112,823 милијарди денари, што претставува зголемување за 12,901 милијада денари во однос на овој период лани. Даноците се остварени со 64,424 милијарди денари каде има зголемување од 14,3 проценти во однос на тој период лани. Ов,а според Ставрески, покажува дека Буџетот е во одлична кондиција и дека ликвидноста на Буџетот е исклучително добра, што овозможува да се врши редовна исплата на сите потреби од буџетот.
Неданочните приходи, како што рече, се за 15,9 проценти зголемени, додека капиталните приходи имат раст со 30,6 проценти, односно 449 милиони денари повеќе од истиот период лани.
Најдобро остварување има данокот на добивка каде има 5,900 милиони приходи повеќе во однос на 2014 година, а кај акцизите има за 18 проценти повеќе приходи што се должи на партнерството на „Филип Морис“ со Тутунскиот комбинат од Прилеп. Кај ДДВ има пониски приходи за 0,8 проценти но, како што вели министерот Ставрески, во јули и август има подобрување на состојбата со остварување на ДДВ по стабилизирањето на состојбата во земјата.
За расходната страна посочи дека е реализирано предвиденото и оти расходите се повисоки за 5,9 проценти, што е во рамки на планираното. Ставрески смета дека ова создава добра основа да се остане во рамки на планираното и на расходната и на приходната страна, а буџетскиот дефицит во рамки на планираното од 3,6 проценти од БДП.
Дефицитот, како што рече, заклучно со 18 септември е за 28,4 проценти понизок отколку истиот во 2014 година.
Очекува годината да се заврши со економски раст над 3 или приближно 3,5 проценти. – Првата половина од 2015 година беше комплексна од аспект на општите политички услови и во такви услови економијата имаше одлични резултати. Првите три месеци е остварен раст од 3,2 проценти, што беше во тој период меѓу петте најдобри остварувања. Вториот квартал кога кулминираше политичката криза македонската економија и натаму продолжи да расте со стапка од 2,6 проценти, рече Ставрески и додаде дека остварениот просечен раст од 2,9 проценти во првите шест месеци покажува дека основните економски политики се добро поставени и дека дури и политичките случувања не ја дестабилизираа економијата и македонските компании, како и странските, продоложија со производството и извозот и остварија добри резултати.
Тој најави дека наскоро до Собранието ќе биде доставен предлог буџетот за наредната година во кој силно ќе биде изразена развојната компоненета, односно дека ќе има значителни средства за капитални инвестиции кои, како што вели министерот, се покажаа како еден од двигателите на растот и развојот на македонската економија.
Истакна дека ќе се води сметка и за социјаната димензија, односно дека сите категории граѓани како што се пензионерите, примателите на социјална помош, земјоделците може да очекуваат и натаму значајна и силна поддршка во заштита на животниот стандард и поддршка на приходот на домаќинствата кога станува збор за доделување социјална помош, субвенции и раст на пензиите.
Буџетот во среднорочните рамки е предвидено да има пониско ниво на буџетски дефицит, кој постепено до 2017 година треба да се намали под три проценти што ќе овозможи да се одржи стабилно ниво на долг кое, како што рече Ставрески, и сега е на умерено ниво односно со јавен долг од 43,6 проценти и 36 проценти државен Македонија е меѓу пониско задолжените земји во Европа.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
