Втората половина од 36-то издание на ИФФК „Браќа Манаки“ денеска, 23-ти септември, продолжува со 12 проекции на кратки анимации, филмови во рамките на документарната програма, „Макпоинт“, „СЕЕ Камера“, „Нов Европски филм“ и секако филмови во конкуренција за највисоките фестивалски признанија.
Од ИФФК „Браќа Манаки“ информираат дека претпладнево во малата сала на битолскиот Центар за култура мастер клас ќе одржи канадската продуцентка Хајет Бенкара која има долгогодишно искуство во работа за Интернационалниот филмски фестивал во Торонто.
Бенкара работела за Фестивалот во Кан, за Берлиналето, Фестивалот во Ротердам, Интернационалниот филмски фестивал во Дубаи, Филмскиот институт во Гуанахуато, и во последно време за Филмскиот фестивал во Локарно. Исто така, таа е визитинг-професор во Бингер лаб во Амстердам. Во текот на своето работење ги советува младите и етаблираните филмски творци и продуценти за развој, продукција, копродукција, дистрибуција, маркетинг и фестивалски стратегии и токму тоа ќе биде фокус на денешниот мастер клас во Битола.
Според програмата, денес ќе се одржи и панел дискусија на тема филмска критика, а попладне во чест на лауреатот, српскиот кинематографер и режисер Божидар Бота Николиќ ќе биде емитуван филмот „Три карти за холивуд“. Публиката во Битола со голема љубопитност ги очекува и вечерашните проекции на американскиот филм „Платен убиец“ кој е еден од конкурентите за фестивалски награди, данскиот филм „Бридгенд“ кој се емитува во програмата „Нов Европски филм“ и хрватскиот филм „Звиздан“ во режија на Далибор Матаниќ кој на фестивалот во Пула освои 6 златни арени, а воедно го отвори сараевскиот филм-фестивал.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
