Локалните власти во турскиот пограничен град Едрене денеска соопштија дека на бегалците од Сирија и другите земји од Блискиот Исток нема да им дозволат да преминат преку копнената граница со Грција, јави ТАСС.
– Едноставно не можеме да им дозволиме на овие луѓе да преминат на територијата на Грција. Ако некои од нив имаат основа за минување на границата, како покана или официјална најава од некоја земја дека е подготвена да ги прими, ние ќе ги качиме на авиони или во автобуси и ќе ги испратиме таму. Но, засега ниту една земја не најави таква иницијатива. Затоа ние не можеме да се однесуваме поинаку- изјави гувернерот на Едрене, Дурсун Али Шахин.
Во пограничните региони на Турција кон Грција од 14 септември почнаа да пристигнуваат поголеми групи имигранти, чија цел е како што велат „да влезат во Европа“. Во моментов во тој регион се собрани неколку илјади бегалци, на кои турските власти им дадоа рок до денеска да ја напуштат пограничната зона.
Бегалците меѓутоа најавија дека немаат намера да ја напуштат пограничната зона на Турција, се додека не се сретнат со турскиот премиер Ахмет Давутоглу. Според нив, доколку не дојде до таква средба тие се подготвени самоиницијативно да тргнат кон турската граница со Грција.
Гувернерот Шахин, од своја страна изрази жалење што не дошло до средба меѓу Давутоглу и бегалците.
– Нашиот премиер е многу зафатен. Утре неколку претставници на локалната власт ќе се сретнат со премиерот, а за сосотјбата во регионот ќе разговараат и со претставници на ОН и ЕУ- најави Шахин.
Во меѓу време на централната автобуска станица во Истанбул и натаму се наоѓаат околу 1.500 бегалци, кои се обидуваат со автобуси да заминат кон пограничните региони на Турција со Грција.
Турските власти засега не им дозволуваат да се упатат кон границата, туку ги држат во реонот на автобуската станица, редовно обезбедувајќи им храна и вода.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
