Од денеска почнува примената на петовалентните вакцини. Дозите веќе се распределени до центрите за имунизација.
Со едно боцкање бебињата ќе бидат заштитени од дифтерија, полио и од менингит. Вакцината е предвидена за новороденчиња кај кои процесот на имунизација веќе почнал. Во меѓувреме, над илјада бебиња во државата ја примиле шестовалентната вакцина.
Од август, кога почна нивната употреба, заврши и патешествието за родителите кои секој месец мораа да ги посетуваат Центрите за имунизација. Боцкањата од 13 се сведени на 7.
Шестовалетната содржи и хепатит Б, која ја нема кај петовалентната.
-Во Скопје се аплицирани 666 дози. Досега не е пријавена несакана реакција, освен локалните, кои се вообичаени во првите 24 часа и за нив родителите добиваат совети од тимовите во центрите за имунизација. Покрај за децата, бенефитот од овие вакцини имаат и здравствените работници што работат во центрите – вели д-р Татјана Баевска Вучковиќ, директор на Здравствен дом Скопје.
Според педијатрите, до 18-месечна возраст секое бебе треба да прими две шесто и две петовалентни вакцини. Нивната примена остава простор за воведување на нови вакцини во задолжителниот календар. Една од нив може да биде пневмококната, која сега е по избор. Од Министерството за здравство до центрите доставиле 600 дози. Таа може да ја добијат бебиња од два месеца до пет години и ги штити од опасната бактерија, која предизвикува тешки форми на пневмонија.
– Оваа бактерија се пренесува преку капков пат, а децата во градинките се изложени на тоа. Штити од пневмонија, високата фебрилност, воспаленија кои пак му сметаа на правилниот раст и развој на децата кој е најинтензивен кај оваа возраст – вели д-р Баевска Вучковиќ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
