Унгарија нема да стрела кон емигрантите кои се обидуваат да минат преку новата ограда на нејзината јужна граница и е отворена за преговори за европските квоти за прием на бегалци, откако ќе заврши поставувањето на оградата, изјави унгарскиот премиер Виктор Орбан.
Во интервјуто објавено денеска од државната радиотелевизија ОРФ, Орбан повторно го изрази својот став дека емигрантите од Блискиот Исток, Африка и од Азија, кои минуваат низ Унгарија, всушност не бегаат од сиромаштија и тие не се вистински бегалци, на кои им е потребен азил. – Ние ја заштитуваме Европа согласно со европските правила, според кои границите можат да бидат поминати само на одредени места на контролиран начин и со регистрирање – рече Орбан.
На прашањето дали на војниците на границата ќе им биде наредено да стрелааат, тој одговори: „Не, тоа нема да биде потребно, бидејќи ќе има ограда, преку која нема да можат да поминат. Сепак, секој што ќе одлучи да ја прескокне оградата ќе биде уапсен и изведен пред суд. Употребата на оружје нема да биде потребно“.
– Доколку надворешната граница на Европа не е блокирана, нема смисла да зборуваме за квоти. Кога ќе ја затвориме надворешната граница и ќе ја спречиме нелегалната миграција, може да зборуваме за некакво решение – одговори Орбан на прашањето дали би го прифатил прдедлогот на Европската комисија за воведување систем на квоти за распределување на емигрантите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
