Единици на јужнокорејските вооружени сили се распоредени покрај границата со Северна Кореја под целосна борбена готовност, изјави претставник на Министерството за одбрана во Сеул.
Наредбата е добиена откако синоќа е решено да се обнови испраќањето на пропагандни пораки кон територијата на Северна Кореја.
Според официјалниот претставник, во реонот на демаркираната гранична линија се испратени дополнителни артилериски единици, кои се подготвени во секој момент да извршат напад при евентуална нова провокација, а јужнокорејското разузнавање внимателно го следи секое движење на севернокорејската војска.
– Од жителите на реонот е побарана максимална внимателност, а земјоделците се повикани да ги напуштат нивите – истакна портпарол на Министерството за одбрана.
Сеул го обнови испраќањето на пропагандни пораки како одговор на воената провокација од страна на Пјонгјанг, во која беа повредени двајца јужнокорејски војници. Програмата за психолошка војна со Северна Кореја беше прекината пред 11 години, кога односите меѓу двете земји се подобрија.
Пропагандните пораки, кои можат да се слушнат во радиус од 10 километри, содржат меѓународни вести, информации за времето, како и пораки со кои се осудуваат севернокорејските провокации и се нагласува значењето на демократијата.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
