Турскиот претседател Реџеп Таип Ердоган побара поддршка од лидерите на другите муслимански држави во офанзивата против џихадистичката Исламска држава. Тој бара да се затворат каналите и патиштата по кои екстремистите пристигнуваат во Турција, изјави неименуван пакистански претставник.
Тој тврди дека Ердоган побарал помош од лидерите на Индонезија, на Малезија и на Пакистан. Турскиот претседател по посетата на Индонезија синоќа го посети Пакистан и имаше средба со премиерот Наваз Шариф.
Ненајавената посета се случува неколку дена откако турски воени авиони почнаа напади врз позициите на ИД во Сирија.
Владата на Ердоган често е критикувана дека ги толерира илјадниците екстремисти од целиот свет кои преку Турција пристигнуваат на боиштата во Сирија и во Ирак.
Според неименуваниот пакистански претставник Ердоган е одлучен да ја ослободи Турција од заканата од исламскиот екстремизам.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
