Повеќе од 50 деца војници на Исламска држава годинава се убиени во Сирија

Од почетокот на оваа година во Сирија се убиени повеќе од 50 деца војници, кои биле регрутирани од екстремистичката група Исламска држава, соопшти денеска сирискиот Центар за мониторинг на човековите права, пренесе Танјуг.Оваа група за мониторинг, со седиште во Лондон, го документирала загинувањето на 52 деца војници, на возраст под 16 години, кои биле дел од програмата на ИД „Младината за калифат“.

Програмата нуди интензивна воена и верска обука за деца на подрачјето кое ИД го контролира во Сирија, пренесуваат француските медиуми.

Само во јули, дури 31 деца го загубиле животот, во експлозии, судири и воздушните напади на сирискиот режим и коалициските сили, предводени од САД.

Децата војници најчесто ги чуваат контролните пунктови или собираат разузнавачки податоци од подрачјата кои не се под контрола на ИД, но оваа екстремистичка група се почесто ги користи и за егзекуција на затвореници или изведување самоубиствени напади.

Од јануари годинава ИД искористила 18 деца за самоубиствени бомбашки напади, а неодамна и во борба против курдската милиција на североисток од Сирија.

Од почетокот на 2015 година ИД има регрутирано повеќе од 1.100 деца.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.