Вечерва на МНТ-Фест гостуваат Унгарците со „Сон на летната ноќ“

Вечерва на сцената на Македонскиот народен театар (20 часот) гостува Унгарскиот национален театар од Будимпешта со претставата „Сон на летната ноќ“ во рамките на вториот МНТ-Фест.

Една од најпознатите драми на Шекспир зборува за необичната врска помеѓу сонот и јавето. Најчесто се игра како лесна и весела бајка во која се испреплетуваат комични елементи и експлицитна сексуалност. Маѓепсани од љубовта и љубоморните богови, ликовите талкаат низ шумата, но на крајот сите си го наоѓаат својот партнер.

Според грузискиот режисер Давид Доjашвили, ова толкување се однесува само на површинскиот текст и не го опфаќа подлабокото значење на драмата. Остриот хумор и лежерното расположение играат важна улога во претставата на Националниот театар од Унгарија, но тоа важи само кога е присутна моќната драма на променливите чувства, желби и разочарувања, т.е. темната страна на човекот.

Давид Дојашвили е роден во Тбилиси. Дипломирал на Државниот институт „Руставели“ во Тбилиси. Режира претстави во театри не само во Тбилиси, туку и надвор од границите на Грузија. Негови познати продукции се: „Дрво“ од М. Дојашвили, „Мадам Бовари“ од Г. Флобер, „Три сестри“ од А. Чехов, „Саломе“ од О. Вајлд. Тој, исто така, ги има режирано и „Сон на летната ноќ“ од В. Шекспир во Кралскиот национален театар во Лондон и „Искушение“ од А. Милер во театарот „Плејхаус“ во Лидз, Велика Британија. Во 2000 година, првпат режира опера, и тоа „Лучија од Ламермур“ од Г. Доницети за театарот „Марински“. Неодамна стана уметнички на Државниот музички и драмски театар „Васо Абашидзе“ во Тбилиси.

Во претставата играат: Ото Хорват Лајош, Естер Наѓ-Калоци, Денеш Фаркаш, Ласло Тот, Тибор Фехер, Бенце Маќаши, Камила Фаќол, Каќа Томпо, Габор Ревицки, Атила Криштан, Јожеф Сарваш, Адам Шнел, Јожеф Варга и Јожеф Рац.
За претставата е обезбеден превод на македонски јазик, а билетите чинат 200 денари.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.