Здравата и правилна исхрана е од клучно значење за да постигнете максимални резултати и да го одржите телото здраво и хидрирано додека вежбате.
Исхраната и вежбањето одат рака под рака. Што, кога и колку ќе јадете влијае врз тоа како ќе се чувствувате додека вежбате, сеедно дали вежбате или рекреативно се занимавате со некој спорт. Не заборавајте дека времетраењето и интензитетот на физичката активност ќе диктира колку често и што треба да јадете и пиете. Пијте од 450 до 550 милилитри вода 1-2 часа пред да почнете да вежбате.
Здрав појадок
Ако вежбате наутро станете порано за да појадувате, тоа значи саат-два пред да почнете со вежбање. Телото веќе го искористило поголемиот дел од енергијата од синоќешната вечера и нивото на шеќерот во крвта сигурно е опаднат. Ако не јадете ќе се чувствувате млитаво и слабодушно додека вежбате. Ако планирате да вежбате еден час по појадокот, јадете нешто полесно или напијте се нешто да го покачите шеќерот во крвта, како некој спортски напиток. Внесете доволно јаглехидрати за максимум енергија. Одличен избор за појадок: Мешани житарици или леб, млеко со ниска масленост, свежо цеден сок, банани.
Големината на оброкот е важна
Внимавајте да не претерате со јадење пред вежбање. Во спротивно ќе ви биде тешко додека вежбате, а може и да добиете грчеви во стомакот или да ви се слоши. Големите оброци јадете ги најмалку три часа пред вежбање, средните 2 до 3 часа пред вежбање, а малите еден час пред физичката активност.
Квалитетна ужинка
Повеќето луѓе јадат мали ужинки непосредно пред вежбање. Изборот е ваш, во зависност од вашите навики и интензитетот на вежбите. Здравите ужинки се особено важни ако планирате да вежбате најмалку два часа, а идеален избор се: енергетски пијалаци или протеински плочки, банана или друго свежо овошје, јогурт, овошни шејкови, крекери или интегрален перек.
Што да не јадете пред вежбање?
Готвена храна од претходниот ден: тестенините, оризот и компирите се одличен извор на јагленохидрати, но ако се јадат без додатоци (освен доматен сос) и силни зачини и ако се свежо приготвени. Помфрит: Пржената храна ќе ве забави во вежбањето, вели Мануел Вилјакорта, нутриционист и портпарол на Американското здружение за исхрана. Сигурно ви е повеќе од јасно дека треба да избегнувате брза храна воопшто, особено пред вежбање. Дури и грицките што содржат висок процент на заситени масти, како бадеми или лешници, може да ве омлитават. Салата од зеленчук: лесна салата од зеленчук звучи како одличен оброк пред вежбање, но не е така. Марулата, брокулите, зелката, карфиолот и другите зеленчуци богати со растителни влакна се најчест извор на дигестивни проблеми, како што се и јаткастите плодови и семки, велат експертите од Mayo Clinic. Сите овие спаѓаат во здрава храна, но не се погодни за оброк пред вежбање бидејќи не содржат доволно јаглени хидрати што се потребни за енергија. Газирани пијалаци: Енергетските и безалкохолните газирани пијалации предизвикуваат гасови и подување, а содржат и многу шеќери. Можеби даваат многу енергија, но таа е краткотрајна и за брзо време ќе малаксате и ќе имате грчеви во стомакот.
Што да јадете по вежбање?
Внесувајте протеини за да ги заштитите мускулите од истегнување и воспалување, а наедно ќе ги обновите по вежбањето. Идеален избор за оброк по вежбање: oвошје и јогурт, oреви, oвесна каша, житарици и млеко, мешавина од ореви и суво овошје, свеж зеленчук, тврдо варени јајца (или белка од јајце), дробено сирење и овошје, половина путер од кикирики или сенвич со мисиркино или пилешко месо со леб од житарици, житарици со путер од ореви или сирење, колачиња со житарици или овошје, чоколадно млеко, сок од домати или некој друг зеленчук, јогурт (со зголемено ниво на протеини).
Извор: Пиксел.мк
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
