Основното jавно обвинителство ја одби кривичната пријава за пејачката Андријана Алачки, која пред неколку месеци прегази пешак на Рузвелтова во Скопје
Имено за предметната сообраќајна незгода случена на ул. Рузвелтова, при што едно лице го загуби животот, од страна на Министерството за внатрешни работи беше доставена кривична пријава за едно лице за сторено кривично дело тешки дела против безбедноста на луѓето и на имотот во сообраќајот.
Во текот на постапката од страна на одбраната беа доставени две вештачења, во согласност со кои кај осомничената не постои вина за настанување на незгодата. Со цел правилно утврдување на фактичката состојба, од страна на Основното јавно обвинителство Скопје со наредба е наложено ново вештачење, во согласност со кое возачот не направил пропусти, а пешакот е тој што има направено пропусти кои се причинско последично поврзани со настанување на незгодата. Од страна на оштетените – законски застапници на сега починатото лице, доставено беше вештачење што по наодот и мислењето се разликуваше од другите вештачења, стои во соопштението на Обвинителството.
Со дополнително вештачење, Обвинителството утврдило дека пешакот е виновен за несреќата
„Согласно вештиот наод и мислење на тимот од вешти лица при Бирото за судски вештачења произлегува дека возачот во конкретната ситуација реагирал соодветно на дадената ситуација. Имено, во околностите кои се создале со неправилното и невнимателно преминување на пешакот преку коловозот надвор од пешачки премин, возачот немал техничка можност да ја избегне незгодата. Тимот од вешти лица констатира дека опасната ситуација ја создал пешакот, а возачот немал никаква техничка можност за избегнување на незгодата.
Со добиеното вешташење од тимот вешти лица од Бирото за судски вештачења се потврдија наодите од претходните вештачења, со што јавниот обвинител не поклони верба на заклучоците дадени во вештиот наод и мислење доставен од оштетените, бидејќи истите се спротивни со заклучоците на сите останати вешти лица.
Со оглед на фактот дека возачот – осомниченото лице во целост постапило согласно сообраќајните правила и прописи, јавниот обвинител утврди дека во дејствијата на осомниченото лице нема елементи на кривично дело што се гони по службена должност – велат од ОЈО.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.