Баросо: Унгарија може да воведе смртна казна, но само ако излезе од ЕУ

Унгарија може повторно да воведе смртна казна, но само ако ја напушти Европската унија, изјави поранешниот претседател на Европската комисија Жозе Мануел Баросо во интервју за унгарската ТВ-куќа АТВ.

– Ако земја-членка сака да воведе смртна казна, тоа може да го направи, но во тој случај ќе мора да ја напушти ЕУ – рекол Баросо, реагирајќи на унгарскиот премиер Виктор Орбан, кој повика на дебата за повторно воведување на најстрогата казна.

Баросо, кој беше претседател на ЕК од 2004 година до 2014 година истакна дека повторното воведување на оваа казна едноставно не е можно во некоја земја членка на унијата.

– Дебатата е одамна завршена, сите земји-членки беа јасни по тоа прашање – наведува Баросо.

Орбан пред два дена изјави дека секоја членка треба да донесе сопствена одлука за воведување на смртната казна.

– Сакаме ЕУ да заземе заеднички став дека секоја држава членка на национално ниво може да донесе одлука дали да воведе смртна казна или не. Ако се случи такво нешто, може да одлучуваме дали прифаќаме или не смртна казна. Нема причина сите држави во ЕУ исто да мислат за тоа прашање – рекол Орбан.

Орбан го отворил ова прашање по неодамнешното убиство на млад сопственик на трафика во јужниот унгарски град Карпошвари што предизвика гнев во земјата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.