Западен Балкан треба да се вклучи во борбата против тероризмот

Во борбата против тероризмот и организираното префрлање на илегални имигранти потребна е тесна соработка и сојуз со државите од Западен Балкан, изјави денеска австриската министерка за внатрешни работи Јохана Микл-Лајтнер. Таа, по повод состанокот во рамките на безбедносното партнерство „Форум Салцбург“ во Санкт Пелтен за миграција, тероризам и кибер безбедност, нагласи дека во областа на азилот и миграцијата постои потреба за дејствување.

Микл-Лајтнер наведе дека само минатата година 278.000 луѓе илегално влегле во земјите-членки на ЕУ, а 60 проценти од нив преку Медитеранот, а останатите ја користеле балканската рута.

– Поради тоа во исто време сме фокусирани и на балканската рута, истакна Микл-Лајтнер, додавајќи оти е потребно вмрежување на полициите и интензивна соработка со партнерите како што се Фронтекс, УНХЦР и ЕАСО. Посочи и дека се работи на воспоставување на мрежа во борба против лицата кои пренесуваат илегални имигранти.

Австриската министерка за внатрешни работи се осврна и на борбата против тероризмот, потенцирајќи дека тој проблем барал размена на информации со интензивно вклучување на Европол и Интерпол.

– Важно е да се вклучат државите од Западен Балкан во идната институција на Европол за пријавување на радикални содржини на интернет, наведе Микл-Лајтнер.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.