Околу педесет илјади евра штета претрпел Г.А.(49) од тетовското село Челопек откако минатата ноќ во 22 часот и 30 минути избувнал пожар во неговиот објект што половина бил мини живинарска фарма, а во другата половина се наоѓала работилница за столарија, информираше денеска портпаролот на СВР Тетово, Марјан Јосифовски.
Според информациите на полицијата, пожарот под се уште нејасни околности избувнал внатре во објектот целосно опожарувајќи ја неговата внатрешност и покривната конструкција. При тоа изгореле околу 2.000 кокошки од живинарската фарма како и инвентарот од работилницата, дрвниот материјал и сите алатки и машини меѓу кои имало фреза, циркулари, компресори, бор машини и друго, што, според, сопственикот чини над 50 илјади евра.
Во време на избувнувањето на огнената стихија немало никој во објектот така што нема повредени. Пожарот бил локализиран со интервенција на тетовската територијална противпожарна единица . Комплетен увид на местото од извршила екипа на полицијата и се работи на утврдување на причините и околностите за избувнувањето на пожарот, рече Јосифовски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
