Комбинација која го одзема здивот и ве води на некое друго место, во некоја друга музичка и не само музичка димензија, вака Влатко Стефановски ја опишува новата соработка со словенечкиот саксофонист и флејтист Васко Атанасовски и Камерниот гудачки оркестар на словенечката филхармонија. Ова несекојдневно музичко доживување ќе се се одржи оваа сабота на 21 март во Дом на АРМ.
Наместо еден голем концерт, поради хаваријата на покривот на Универзалната сала, перформансот „Fire and Ice“ ќе биде изведен во 19 и во 21 часот, во два одделни концерти.
– Ќе се обидеме да ве однесеме некаде каде што барем за момент ќе можете да ги оставите секојдневните проблеми и грижи и заедно да патуваме во најдобрата Македонија. Најдобрата Македонија за мене е македонската музика и она што нашите предци го оставиле како наследство, како традиција и аманет што мора да се чува и нешто што не смее да се заборави – изјави Стефановски на денешната прес конференција.
На концертот ќе бидат изведени авторски песни на Стефановски и на Атанасовски, но и нови аранжмани од македонскиот и од словенечкиот фолклор.
– Среќен сум што некого можам да научам малку од мојата приказна, да ја раскажам што пошироко и подалеку, тоа е привилегија. Да ги научам Словенците да го научат да го свират Калајџиско оро, тоа зборува дека сум успеал да се наметнам и да продадам нешто што е добро, тоа е привилегија – вели Стефановски.
Како некој што постојано сака да експериментира со нови музичари или настапи, дали соло, со друг музичар или филхармонија, Стефановски вели дека понекогаш се плаши кога премногу е застапен во медиумите.
– Има голем интерес за концертот и деновиве некако насекаде ме има, но во оваа иперполитизација која владее во последно време, можеби е и добро малку јас да прошарам – се смее тој.
Викендот Стефановски имаше успешен настап во Загреб, а следните настапи се уште ги планира.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
