Нови објекти во Скопје со футуристички дизајн

Градбите со модерен и иновативен дизајн кои наскоро ќе го красат Скопје.

Драмски театар Скопје

Новата зграда на Драмскиот театар ќе има стаклена фасада со современ изглед. Објектот ќе биде висок 30 метри, ќе има вкупно шест ката и во својата програма има планирано подземно паркирање.

Телекомуникациска кула на Водно

Во близина на Милениумскиот крст на Водно, планирана е изградба на телекомуникациска кула каде што ќе бидат сместени предавателите на македонските оператори и антенскиот систем за контрола и мониторинг на радиофреквенциите. Во склоп на објектот се предвидува ротирачки ресторан кој ќе овозможи панорама над градот. Кулата ќе биде со висина од 155 метри.

Универзална сала

Новиот изглед на Универзална сала ќе има современ дизајн во јајцевидна форма. Новиот објект ќе има речиси двојно поголем капацитет од претходно и истовремено таа се планира да биде мултифункционална сала: голема сала со капацитет од 2.500 до 3.000 седишта и мала сала од 200 до 300 седишта.

Македонска филхармонија

Програмата на Македонската филхармонија опфаќа мала концертна сала со капацитет до 400 посетители и голема сала со капацитет од 1.050 до 1.100 посетители. Дополнително се предвидени простории за вежбање на музичарите.

Основно училиште во населба Капиштец

Идејниот проект за новото основно училиште во Капиштец е во својата почетна фаза на реализација. Избрано е идејното решение врз чија основа треба да се изготви основен проект, а во меѓувреме е распишан тендер за избор на фирма која ќе ги извршува градежните работи.

Турски театар

Проектот за Турскиот театар е добитник на повеќе домашни и меѓународни награди. Со изградбата на театарот се овозможуваат современи услови за работа во самостоен објект, кој претходно ја делеше истата зграда со Албанскиот театар.

Театар Центар

Овој проект се однесува на театар „Центар“ или денешен театар „Комедија“. Проектанти на овој објект се архитектите Митко Хаџи Пуља и Минас Бакалчев, во соработка со Никола Стрезовски, Саша Тасиќ, Бетим Зеќири и Бесијан Мехмети. Објектот е во приватна сопственост и во негов склоп се превидува површина која ќе биде во сопственост на инвеститорот. Инвестицијата на овој проект изнесува околу 250 милиони денари.

Извор: porta3.mk

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.