Санацијата на мостот на реката Пчиња во село Долно Коњаре треба да заврши до крајот на април годинава, најавија денеска министерот за транспорт и врски Миле Јанакиески и директорот на Јавното претпријатие за државни патишта, Владо Мисајловски.
За оваа намена, посочија, се обезбедени 3,5 милиони денари.
Мостот е стар 32 години, а со интервенцијата ќе се зголеми неговата стабилност.
– Овој мост е особено значаен за жителите на Ржаничино и Коњаре бидејќи ги поврзува двете населени места – истакна Јанакиески пред почетокот на градежните активности.
Како што нагласи Мисајловски, мостот долг 136,60 метри, а широк четири метри, има 22 отвора, со меѓусебно растојание на столбни места од 5,6 метри. Критични и неопходни за санација се две столбни места на средината.
– Санацијата е неопходна зашто е изграден во 1983 година. Дното на речното корито е веќе спуштено, водата со текот на времето го поткопала поради што е зголемена висината на столбовите, а тоа негативно влијае на стабилноста на мостот. Врз стабилноста влијае и нерегулираното корито на реката, како и нередовното чистење од наноси на гранки, трупци и друг отпад – изјави Мисајловски.
Тој информира дека минатата година почна изградбата на два нови моста, кај Злеово во општина Радовиш и на реката Злетовска кај село Пишица, општина Чешиново – Облешево. Кон крајот на 2014-та стартуваше и санацијата на мостот на Вардар на делницата Желино-Сиричино.
– Санацијата на овие четири моста ќе заврши во првата половина на годината, а за нив ќе бидат одвоени вкупно 61 милиони денари – подвлече директорот.
Според него, оваа година приоритет ќе биде санацијата на мостот на река Брегалница на делницата Кочани – Зрновци кој беше оштетен од неодамнешните поплави и за кој во моментов се подготвува техничко решение за градежно-санациони работи на мостот.
Планирани се и градежно-санациски работи на мост на делницата Гостивар – превој „Стража“, на мост на реката Треска на делницата Македонски Брод – Самоков и зградба на армирано – бетонски мост на делница Тркање – Пишица, кај село Соколарци.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
