„Б на квадрат“ е насловот на концертот на Македонската филхармонија, кој ќе се одржи вечерва (четврток) во Македонската опера и балет во 20 часот.
Под палката на маестро Емил Табаков од Бугарија, како солист ќе настапи младиот пијанист од Швајцарија, Тео Георгиу, кој ќе го изведе познатиот виртуозен Концерт за пијано и оркестар бр. 3 од Лудвиг ван Бетовен. Георгиу го привлече вниманието на критиката и публиката уште кога на само 12-годишна возраст ги освои првите награди на меѓународните пијано натпревари во Сан Марино и Вајмар, а денес е нарекуван спектакуларен пијанист што настапува со врвни симфонски оркестри.
На програмата на концертот „Б на квадрат“ е и грандиозната Четврта симфонија на австрискиот композитор Антон Брукнер наречена „Романтична“, која се смета за второто колосално дело посветено на природата, покрај Шестата „Пасторална“ симфонија на Бетовен, но и за првото негово симфониско ремек-дело. Брукнер на него работел цели шест години, а во целина симфонијата може да се протолкува како „романтика на шумата“, како приказ на религиска, космичка смисла на природата.
Инаку, Македонската филхармонија со овој концерт се придружува кон одбележувањето на 30 години од смртта на славниот хрватски маестро, диригентот Ловро Матачиќ (1899-1985), кој остави силни траги на македонската музичка сцена, особено во работата со оркестарот на првата музичка институција во земјава, во почетоците од нејзиниот развој.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
