Две Македонки се венчаа во Хрватска

Две девојки од Македонија се венчале во Осиек, а за овој чин ангажирале и овластен преведувач на македонски јазик, пишува весникот „Гласот на Славонија“.

Преведувачката Јагода Тренески Цветичанин изјавила дека од брачната двојка била замолена на голема дискреција.

– Во Македонија не е дозволен бракот на лица од ист пол. Признавам дека на почетокот бев малку изненадена, ми се чинеше дека бракот се склопува од интерес, но брзо се уверив дека станува збор за голема љубов – изјави Тренеска Цветичанин додавајќи дека за време на венчавањето кумови биле две девојки.

Таа додаде дека новиот брачен пар најверојатно нема да живее во Македонија.

Во Хрватска очекуваат дека наскоро многу вакви бракови ќе почнат да се склопуваат во нивната земја, особено на граѓани од соседните земји, како на пример од Србија и Босна и Херцеговина.

Во Хрватска за последните 6 месеци склопени биле 40 истополни бракови. Најголем дел од нив биле склопени во Загреб – 27, три во Риека, во Сплит и Ровињ по два, по еден во Копривница, Пула, Пазин, Опатија, Дубровник и Осијек.

Во Словенија за 9 години официјализирани се 87 партнерства од истополни лица.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.