Рекордни 321 поен беа постигнати на олстар-мечот меѓу западната и источната конференција, а победата им припадна на кошаркарите од Западот во НБА- лигата со 163-158. Расел Вестбрук го доби признанието за најкорисен играч на натпреварот што мина во фестивалска атмосфера и со многу атрактивни потези од двете страни.
Вестбрук постигна 41 поен, само еден помалку од најдобриот ефект во историјата на овие натпревари во сопственост на легендарниот Вилт Чембрлен.
Дуелот почна симболично со потфрлање на топката за браќата Пау и Марк Гасол, кои играа на спротивните страни. Расел Вестбрук, кој поради повреда не играше на ланското издание, од почетокот најави блескава вечер. Постигна рекордни 27 поени во првото полувреме, а во еден момент при забивање удри со главата во таблата, но продолжи да игра во фантастичен ритам. Поддршка стигна и од Џејмс Харден со 29 поени и од Крис Пол, кој забележи одлични 15 асиситенции.
На спротивната страна расположен за атракции беше Леброн Џејмс со 30 поени и веројатно најатрактивното забивање на вечерта во Њујорк. Кајл Корвер од Атланта хоукс, екипа што имаше најмногу претставници на олстар- мечот (четири), постигна 21 поен и 7 тројки од 12 обиди.
Бекот на „јастребите“ помогна да се урне рекордот по број на тројки, и тоа убедливо. Беа постигнати 48, со што се надминаа ланските 30 тројки. Со 321 поен на мечот, ова беше најефикасниот олстар, поминувајќи ја ланската граница од 318 поени.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
