Во Лил денеска почнува судењето на поранешниот извршен директор на Меѓународниот монетарен фонд, Доминик Строс-Кан, под обвиение за подведување проститутки. На обвинителната клупа, освен Строс-Кан, ќе се најдат уште 13 лица, вклучувајќи и француски и белгиски бизнисмени, како и полицајци.
Поранешниот директор на ММФ и некогаш потенцијален кандидат на француските социјалисти со најголеми изгледи за нов претседател е обвинет за организирање синџир на проституција во Лил, град на север од земјата, во близина на границата со Белгија.
Како што се наведува во стотиците страници од обвинителниот материјал, Строс-Кан проституцијата ја организирал во луксузниот хотел „Карлтон“ во Лил.
Неговата одбрана тврди дека е вистина неговото учество во сексуалните забави во хотелот, но дека тој не знаел оти присутните девојки биле проститутки.
Адвокатите на Строс-Кан тврдат дека тој немал клучна улога во организирањето на тие забави, пренесуваат агенциите.
Судењето во Лил се очекува да го следат стотици новинари, а се случува четири години откако Строс-Кан беше обвинет за сексуален напад врз собарка во хотел во Њујорк.
Овој скандал го чинеше заминување од местото генерален директор на ММФ. На таа функција тој беше од 2007 до 2011 година и важеше за финансиски стручњак, а му се насмевнуваше и кандидатурата на француската Социјалистичка партија за нов шеф на државата во 2012 година, сѐ до појавувањето на скандалот со собарката.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
