УЈП бара да се престане со наплата на надомест при дерегистрација на фискалните апарати

Управата за јавни приходи денеска објави укажување дека треба веднаш да се престане со праксата за наплата на надомест при дерегистрација на фискалните апарати и условување на даночните обврзници, во спротивно ќе бидат преземени сите мерки предвидени со Законот за регистрирање на готовинските плаќања и другите позитивни законски прописи.

Според укажувања од даночните обврзници и известувања на медиумите, се вели во соопштението од УЈП, одредени овластени производители на фискален систем на опрема вршат дерегистрација на старите фискални апарати со надомест, а особено кога даночен обврзник одлучил новиот фискален систем на опрема да го набави од друг овластен производител.

– Со ваквите дејствија им се скратува правото на даночните обврзници за слободен избор за набавка на фискален систем на опрема, се условувааат даночните обврзници, се јавува нелојална конкуренција на пазарот на фискални апарати, што е спротивно на повеке законски прописи. Ваквиот начин на постапување негативно влијае на процесот на воведување интегриран автоматски систем на управување (ГПРС) со што се зголемуваат трошоците на даночните обврзници, а при самата постапка за дерегистрација овластените производители немаат реални материјални трошоци, се вели во соопштението од УЈП.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.