Илјада деца од семејства во социјален ризик на бесплатен зимски одмор

Министерот за труд и социјална политика, Диме Спасов, на денешната прес-конференција информираше за проектот „Бесплатен одмор и рекреација на децата од семејства во социјален ризик“, кој почна да се реализира од летото 2012 година.

Досега оваа бесплатна услуга имале можност да ја искористат 8.000 лица, односно 6.000 дечиња заминале на бесплатен летен одмор, а 2.000  на зимски одмор.

Министерот Спасов информира дека утре излегува јавниот повик за бесплатно зимување, на кој сите заинтересирани родители кои користат социјална парична помош, постојана парична помош, детски додаток, родителски додаток, како и родители на деца корисници на посебен додаток можат да аплицираат за користење бесплатна услуга за одмор и рекреација за своите деца.

– Бесплатен зимски одмор ќе користат и децата без родители и родителска грижа родени во период од 2000 до 2004 година, односно деца – редовни ученици во петто, шесто, седмо и осмо одделение во учебната 2014/2015 година – појасни Спасов.

Оваа услуга ќе се користи во текот на зимскиот распуст во три смени од по 6 дена, во зимските туристички центри. Бесплатниот одмор и рекреација за деца опфаќа 5 полни пансиони, ноќевање со три оброка дневно и едукативни, забавни и спортски активности. Децата корисници на посебен додаток и деца со инвалидитет имаат право на придружник за време на користењето на услугата. Придружникот има право на пет полни пансиони.

– Сите заинтересирани може  да се обратат и да поднесат барање до надлежниот Центар за социјална работа, според местото на живеење, до 31.12. 2014 година, од каде што ќе бидат информирани за користење на услугата. Детални информации можат да се добијат и на веб-страницата на Министерството. Потикнати од позитивните ефекти на овој проект, најавувам   дека истиот ќе продолжи да се реализира и во летниот период, така што 2.000 деца ќе користат бесплатен летен одмор – рече министерот Спасов.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.