Привршува снимањето на филмот „Ослободување на Скопје“

Во Скопје привршува снимањето на долгометражниот филм „Ослободување на Скопје“, чијшто режисер е Раде Шербеџија, а во главната улога првпат на филм дебитира 10-годишниот Давид Тодосовски во улогата на Зоран.

– Убав е филмот. Убава е улогата. Ништо не е тешко. Интересно е. Овде е поубаво отколку на училиште – вели младиот Тодосовски кого Шербеџија го одбра меѓу многу пристигнати кандидати на аудицијата и го најави како голем актер.

Денеска на снимањето присустуваше и министерката за култура на Република Македонија, Елизабета Канческа-Милевска.

– Навистина ми е драго што можев да присустувам на еден сет од снимањето на „Ослободување на Скопје“. Ме радува што целосно е запазена динамиката на снимање на филмот. Како што ме информираа, снимањето добро се одвивало на сите локации. Имав среќа да го видам и младиот актер Давид, кој го толкува главниот лик во филмот, и кој верувам дека ќе се прослави со овој филм. Раде Шербеџија е внесен со целото срце и душа во снимањето. Навистина ми е драго што овој филм е во копродукција со Хрватска и со Финска. И финскиот копродуцент е тука и тој изрази големо задоволство од тоа што е сработено и од текот на снимањето на филмот. Навистина очекувам позитивни реакции – изјави Канческа-Милевска.

Денеска се снимаше депортацијата на Евреите која се случила во Скопје во 1944 година.

– Тогаш биле депортирани 2.500 Евреи. Имаме полно статисти, околу 600. Завршуваме со снимањето в петок, на Свети Никола – изјави Шербеџија.

Филмот почна да се снима во Велес, а потоа продолжи во Битола. Како што беше најавено, ќе финишира на Свети Никола, в петок, на 19 декември. Според најавите, „Ослободување на Скопје“ би требало да биде готов летото во 2015 година.

Сценариото е на Душан Јовановиќ и на Шербеџија, кој играл во праизведбата на драмската претстава во Загреб во седумдесеттите години на минатиот век. Во таа претстава детските ликови ги играле децата на Шербеџија, Луција и Данило, кои денес, исто така, се вклучени во филмот – Данило како копродуцент, а Луција како актерка што го глуми ликот на Лица.

– За мене како продуцент е најважно што завршуваме кога ветивме. Беше напорно. Мислам дека имавме исклучително добро снимање за што е заслужна екипата, а и времето кое многу ни помогна – изјави продуцентот Роберт Насков.

Актерската екипа е интернационална и ја сочинуваат Давид Тодосовски, Силвија Стојановска, Раде Шербеџија, Мико Ноусаинен, Небојша Глоговац, Петар Мирчевски, Јари Вирман, Дејан Лилиќ, Денис Абдула и Аксел Мехмед. Директор на фотографија е Дејан Димески, а Влатко Стефановски е автор на музиката за филмот.

Директор на фотографија е Дејан Димески. Филмот доби финансиска поддршка од Агенцијата за филм на Македонија, Финскиот филмски фонд, Хрватскиот аудиовизуелен центар и Еуримаж. Продуценти се Роберт Насков, Горјан Тозија, Владимир Анастасов и Хрватот Игор Нола. Филмот ќе чини 2,110 милиона евра, од кои Македонија дава 1.250.000 евра, а Еуримаж 310.000 евра.

фото: Игор Ангеловски

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.