Сѐ уште постои голем ризик од ширење на еболата

Шефот на мисијата на ОН, одговорен за борба против еболата во Западна Африка, Тони Банбури, изјави дека сѐ уште постои голем ризик од ширење на смртоносната болест и во останатите делови од светот.

Банбури одби да каже дали целите, кои ги постави во борбата против ебола, се исполнети.

– Постои голем ризик дека еболата може да се прошири и во останатите делови од светот. Некој би можел да влезе во авион во Азија, Латинска Америка, Северна Америка и во Европа и многу е важно што е можно побрзо случаите да се сведат на нула – истакна Банбури за „Би-Би-Си“.

Во октомври Банбури изјави во Советот за безбедност на ОН дека од 1 декември 70 проценти од сите оние што се заболени од ебола ќе мора да бидат под медицински третман, а 70 отсто од починатите да бидат безбедно погребани.

Тој нагласи дека речиси 70 проценти од целите се успешно исполнети во трите најтешко погодени земји од оваа болест – Гвинеја, Сиера Леоне и Либерија.

Досега од ебола починале 6.000 луѓе, а над 16.000 се заразени. Најновите податоци покажуваат дека од смртоносниот вирус неделно умираат меѓу 200 и 300 лица.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.