Документарецот „Лауш“ и победникот на Кан, „Зимскиот сон“ денеска на „Синедејс“

На претпоследниот ден на 13. фестивал „Синедејс“ во 17.30 часот ќе биде прикажан филмот „Дали е среќен човекот што е висок“ на режисерот Мишел Гондри. Станува збор за филм составен од анимирани разговори со познатиот лингвист, филозоф, политички говорник и активист Ноам Чомски.

Во терминот од 22.30 часот ќе следува годинашниот лауреат на Kанскиот филмски фестивал, „Зимски сон“ на реномираниот турски режисер Нури Билге Џејлан.

Германско-ирачкиот „Спомени во камен“ во режија на Шавкат Амин Kорки од официјалната програма ќе биде прикажан во 19 часот во „Фросина“. Од истата програма, од 21 часот е рускиот „Kажи како се викам“ на Нигина Сајфулаева. 

Српскиот документарец „Лауш“ на режисерката Бранка Бешевиќ-Гајиќ ќе биде прикажан во 23 часот во „Фросина“. Филмот е снимен според вистински настани и разговори за животот на Жарко Лаушевиќ, еден од најпознатите актери во поранешна Југославија. Филмот се занимава со делото на Лаушевиќ, неговата уметност, страдањето и со воскреснувањето како уметник. 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.