Шпанските власти запленија 950 килограми кокаин на една јахта во близина на Канарските Острови, при што биле уапсени тројцата членови од екипажот на бродот – двајца Украинци и еден Србин, соопшти денеска шпанското Министерство за внатрешни работи.
Чамецот на шпанската царинска управа вчера ја пресретнал јахтата „Либерти бел“ на околу 200 наутички милји (370 километри) јужно од шпанскиот остров Гран Канарија.
Царинските службеници и полицајци во внатрешноста на јахтата го откриле кокаинот, кој бил веднаш запленет и транспортиран во пристаништето „Лас Палмс“.
– Фактот што екипажот на јахтата бил составена од двајца Украинци и еден Србин, повторно го потврдува фактот дека организирани криминални групи се вмешани во транспортот на кокаинот од јужна Америка во Европа – соопшти шпанското Министерство.
Шпанската полиција минатата недела, исто така, во близина на Канарските Острови, запленила речиси 600 килограми кокаин на една едрилица, која била регистрирана во Чешка. При тоа биле уапсени четворицата членови на екипажот, кои биле државјани на Чешка.
Шпанските власти лани запленија 27 тони кокаин или 28,6 проценти повеќе во однос на 2012 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.