Вечерва на „Синедејс“ филмот „Два дена, една ноќ“

Филмот „Два дена, една ноќ“ на браќата Лук и Жан-Пјер Дарден вечерва во 20 часот ќе биде прикажан во гала-програмата на фестивалот на европскиот филм „Синедејс“. Во истата програма во терминот од 22.30 часот е новиот филм „Мапа до ѕвездите“ на режисерот Дејвид Kроненберг.

Во рамките на официјалната селекција во кино „Фросина“ (21 ч) ќе биде прикажана бугарско-романската копродукција „Викторија“ на Маја Виткова. Во „Фросина“ од 19 часот во програмата „Сине Балкан“ ќе игра „Визави“ на хрватскиот режисер Невио Марасовиќ. Во џебното кино на Младинскиот културен центар во 20 часот ќе биде прикажан „Во живо во Медика“ за алтернативниот бенд „Муљ“. Во рамките на придружната програма од 10 часот во МKЦ ќе почне со работа четиридневната работилница на европската организација за усовршување и развој на продукциските вештини ЕАВЕ.

Инаку, со музичка изведба на „Култура е тоа што нам ни треба / Култура е тоа што го немаме ние / Култура е тоа што го бараме ние“ беше отворено 13. издание на фестивалот на европскиот филм „Синедејс“ во скопското кино „Милениум“.

Фестивалот беше отворен со филмот „Споменик на Мајкл Џексон“ од режисерот Дарко Лунгулов, во кој играат Борис Мливојевиќ, Драган Бјелогрлиќ, Тони Михајловски, Мирјана Карановиќ, Љубомир Бандовиќ и Петар Мирчевски. Епизодна улога во филмот има и Жаклина Стевковска.

– Би сакал да им се заблагодарам и на авторите и на актерите од Македонија кои оставија голем печат на овој филм. Пред две години и еден ден го завршивме снимањето на филмот овде во Скопје и затоа ми е особено драго што со неговата премиера се отвора овој фестивал – рече режисерот на филмот Лунгулов, кој со дел од екипата од филмот присустуваше на скопската премиера.
На фестивалот годинава ќе бидат прикажани повеќе од 100 филма, се очекуваат 200 гости, планирани се десет концерти, како и пет филмски работилници. Фестивалот ќе трае до 22 ноември.

Земја во фокусот годинава е Бразил и ќе бидат прикажани најрепрезентативни филмови од кинематографијата на таа земја.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.