Владина делегација предводена од вицепремиерот Владимир Пешевски од денеска престојува во посета на Швајцарската Конфедерација каде што ќе ги презентира поволните услови за инвестирање и водење бизнис во Македонија.
Делегацијата денеска имаше директни средби со раководствата на компании од прехранбениот сектор и од областа за производство на опрема и системи за греење, ладење и вентилација, како и фирми за производство на машински делови и алати.
Од Кабинетот на вицепремиерот информираат дека на почетокот на следната година посета на Македонија најавиле сопствениците на компаниите „Оспелт“ и „Хилти“.
Во организација на почесниот конзул на Македонија во Принципатот Лихтенштајн, Норберт Зегер, Стопанската комора на Лихтенштајн, македонската Амбасада во Швајцарската Конфедерација, како и канцеларијата на Агенцијата за странски инвестиции и промоција на извозот во Берн вечерва во Цирих ќе се одржи настан на кој е најавено присуство на претставници од бизнис заедницата на Лихтенштајн.
Покрај вицепремиерот Пешевски, во составот на македонска делегација се и министерот без ресор задолжен за привлекување странски инвестиции Висар Фида, почесниот конзул на Република Македонија во Принципатот Лихтенштајн, Норберт Зегер, како и економскиот промотор во Швајцарија, Арлинд Зекири.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
