Давид Бабунски и Даниел Георгиевски ќе имаат кам-бек во македонската репрезентација за квалификацискиот дуел од четвртата рунда против лидерот во нашата група Словачка. На ваков потег се одлучи селекторот Бошко Ѓуровски, кој денеска го соопшти комплетниот список од 20 репрезентативци.
„Го следев настапот на Бабунски за младата репрезентација на Македонија против Романија каде одигра квалитетно и овој повик е награда за тоа издание. За него не треба да се трошат зборови дека е огромен потенцијал од кого многу очекуваме во иднина. Георгиевски игра стандардно во Мелбурн, гледам дека игра на левата бековска позиција и сигурно ќе ни биде од корист“ – изјави Ѓуровски.
Останатите повикани фудбалери се стандардни и беа во комбинација и на претходните мечеви против Шпанија, Луксембург и Украина. По паузата на претходниот собир, повторно во тимот е голманот Мартин Богатинов, а од домашното првенство повикани се Никола Глигоров од Вардар и Аце Стојков од Работнички кои настапија и на средбата со Украина во Лвов.
Македонија по три кола има три бода со два порази на гости од Шпанија со 1-5 и од Украина со 0-1, а го победивме Луксембург на домашен терен со 3-2. Против Словачка ќе играме на 15 ноември од 20,45 часот. Гостите се во одлична форма и се први по три рунди со максимален учинок. На стартот Словаците ја победија Украина со 1-0 на гостински терен, потоа ја надиграа и Шпанија со 2-1 дома, а пак беа уверливи и со Белорусија, селекција што ја победија во Борисов со 3-1.
Список на репрезентативци за мечот со Словачка:
ГОЛМАНИ
Томе Пачовски (Мехелен, Белгија)
Мартин Богатинов (Ермис, Кипар)
ОДБРАНА
Стефан Ристовски (Парма, Италија)
Даниел Георгиевски (Мелбурн, Австралија)
Даниел Мојсов (Бран, Норвешка)
Ванче Шиков (Австрија Виена, Австрија)
Езгјан Алијоски (Шафхаузен, Швајцарија)
Александар Дамчевски (НАЦ Бреда, Холандија)
СРЕДЕН РЕД
Аријан Адеми (Динамо Загреб, Хрватска)
Мухамед Демири (Ст. Гален, Швајцарија)
Никола Глигоров (Вардар)
Александар Трајковски (Зулте Варегем, Белгија)
Давид Бабунски (Барселона Б, Шпанија)
Аце Стојков (Работнички)
НАПАД
Бесарт Абдурахими (Локерен, Белгија)
Агим Ибраими (Марибор, Словенија)
Адис Јаховиќ (Крилја Совјетов, Русија)
Јован Костовски (Еверле Левен, Белгија)
Крсте Велкоски (Сараево, БиХ)
Мирко Ивановски (Клуж, Романија)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
