Ниту една прослава и среќен настан не може да се замисли без пијалак. Било да е тоа „златен даб“, „пепси“ или „миринда“, наздравувањето, доживувањето и освежувањето е еднакво добро. А заслугата за нивното присуство во секојдневниот живот ѝ припаѓа на „Прилепска пиварница“, која со децении ги збогатува сите трпези и сите убави настани. Пиварницата е основана во 1924 година, период што е одбележан со мануелно производство, но сепак со растечка тенденција на производството, за на почетокот на Втората светска војна да достигне производство до 8.000 хектолитри пиво годишно. Во овој долг период од 90 години пиварницата имала подеми и падови, но сите искушенија ги надминала и сега стои исправена пред идните предизвици, горда на минатото, живеејќи ја сегашноста. Еден од најзначајни пресврти на пиварницата се случил во 1980 година, кога ја добива лиценца за производство на светските марки „пепси“ и „миринда“, за во 1991 година да добие и признание за најголема продажба на „пепси“, во апсолутен волумен, во регионот на поранешна Југославија.
– Лично за мене 2000 година е најзначајна затоа што тогаш е лансирано пивото „златен даб“, пиво што успеавме да го изградиме во одлична македонска марка со препознатливост, автентичност и со врвен квалитет. Денес „Прилепска пиварница“ е модерен производствен капацитет, всушност, според опремата што ја имаме, се вбројуваме во петте пиварници во Европа што имаат инсталирано опрема за бескиселгурна филтрација. Годишниот капацитет на варилницата е 582.000 хектолитри пиво годишно. Покрај тоа, сѐ уште ги полниме пијалаците со лиценца „пепси“, „миринда“, „севенап“. Имаме 252 вработени, а надвор од оваа бројка се овластените дистрибутери, кои се наши партнери и соработници – вели првиот човек на пиварницата, Сашко Самарџиоски.
Тој вели дека за успешното опстојување и чекорење напред на пиварницата се заслужни квалитетот на нивните производи и односот кон потрошувачите, кои се во фокусот на нивното внимание.
– Можам да зборувам за периодот од кога јас сведочам на успехот на пиварницата, додека, пак, за претходните 80 години зборува самата историја. Неспорен е фактот дека да се опстои на пазарот цели деведесет години и во тој период да се случат најсуштинските промени во технолошките процеси, во социолошко-културолошката свест, со оглед на фактот дека работиме со специфичен производ, како и на пазарните услови, е успех сам по себе. Но, паралелно со тоа и една друга, исто така, безвременска категорија е важна во одржувањето на пазарот. Квалитетот и односот на потрошувачите кон вистинскиот квалитет. Имено, историјата на „Прилепска пиварница“ немаше да биде толкава и денес немаше да ја одбележуваме оваа значајна бројка ако не нудевме совршено и беспрекорно висококвалитетно пиво. Без разлика на условите, менаџментот или на времето, начинот или обемот на производство, приоритет секогаш бил квалитетот на производот. Тоа не е тајна во „Прилепска пиварница“, тоа е политика на пиварницата, непроменета константа, која е прифатена од секого што дошол на чело на овој капацитет – објаснува Самарџиоски.
Едни од понеубавите периоди за работење на сите, вклучително и пиварницата, секако се кризите, кои со добро управување досега успешно се надминувале. Клучот на успехот лежи во инвестирањето.
– Секоја криза, без разлика дали доаѓа од некои берзански и монетарни движења на глобално ниво или, пак, е наша, локална, не е изненадување и не се појавува инстантно, секогаш има некои навестувачки знаци. Но, уште побитно од тоа е кризата да се дочека подготвено, а тоа не е некое посебно сценарио, само се спроведува производствениот процес, постојано се работи рентабилно и за профит што ја дава сигурноста за во време на криза. Друго непишано правило е дека треба еднакво да се продолжи со инвестиции дури и во таков период. Во изминативе десет години, што и локално и глобално ги одбележа период на речиси константна криза, ние во пиварницата инвестиравме опрема повредна од 20 милиони евра. Новата опрема го подобри производството, капацитетот, квалитетот, а сето тоа се одрази позитивно врз нашето работење – вели првиот човек на „Прилепска пиварница“.
Тој за условите за работење пошироко, но и локално, вели дека ги создаваат самите учесници на пазарот, а како карактеристика на македонскиот пазар ги акцентира раздвиженоста, динамичноста, присутната и респектабилна конкуренција.
– Се натпреваруваме и со домашни и со странски марки, а истовремено и сме дел од тие марки. Имаме стратегија и визија, која заедно со нашите соработници и партнери успешно ја спроведуваме. Иако со поголемиот дел од производите сме присутни само на македонскиот пазар, со два производа пиварницата е присутна и на странските пазари. Тоа се добро познатиот „златен даб“ и „газоза“. Неспорно, „газоза“ на странските пазари доживува вистински успех, пред сѐ поради автентичниот вкус, нетипичен и непознат за западноевропските потрошувачи. Токму со тие карактеристики таа си го отвори патот и си обезбеди место на полиците во Австрија, Швајцарија, Шведска, Австралија и Соединетите Американски Држави. Но, ништо не е поинаку и на нашиот пазар. И нашиот, домашен потрошувач ги бара истите карактеристики и секој производ што се карактеризира со квалитет, препознатливост и со автентичност, ќе успее. На тоа, секако, треба да се додаде и соодветна комуникација. „Прилепска пиварница“ се изгради во синоним за одличен квалитет, постојаност, пијалаци што станаа национална вредност и постојана комуникација со купувачите – вели младиот Самарџиоски, кој на местото генерален директор дојде по повлекувањето на неговиот татко од таа функција, продолжувајќи ја традицијата на успешно работење.
– Со заминувањето на нашиот татко од раководната позиција во „Прилепска пиварница“, функционирањето на компанијата го презедовме јас и сестра ми Панде Самарџиоска. Во компанијата владеат вредности што се следат уште од основањето на фабриката. Една од тие вредности е квалитетот, односно да се понуди производ со врвен квалитет и да се одржи и понатаму, да се почитуваат и да се придржуваат постигнатите стандарди. Но, успешноста на една компанија не се сведува само на квалитетот и на производот. Семејните вредности што ги негуваме, но и самите вработени, со нивната посветеност на работата придонесуваат во успешноста во целост. „Прилепска пиварница“ во својата работа е поврзана и со своите партнери и соработници, кои во голема мера придонесуваат во нашиот успех. Така што успехот на „Прилепска пиварница“ не е само дело на менаџментот, туку на компанијата во целост – објаснува Самарџиоски.
Менаџментот на пиварницата смета дека со работата и со успесите во изминатите години веќе ги поставиле темелите на нивната иднина.
– Нѐ очекува многу работа, нови простори за освојување, нови височини и достигнувања. Изминатите признанија и награди што ги добивме се само поттик за тоа, така што останува само да продолжиме со посветената работа, да се придржуваме кон предвидените планови и цели – додаваат од „Прилепска пиварница“.
(Пишува: Александрија Стевковска
Текст објавен во 112. број на неделникот „Република“, 24.10.2014)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
