Опстојувањето на еден бизнис со години, негово проширување, надградување и подобрување е знак дека тој е стабилен и перспективен, но и дека го води тим кој знае да се бори со предизвиците на современото живеење и да плива успешно во немирните води на економското опстојување. А, кога ќе се спомене дека тој производител е влезен во секој дом и ни го збогатува животот со слатки и со солени задоволства, тогаш сликата за работењето на „Витаминка“ станува покомплетна и целосна. Фабриката, која е основана во далечната 1956 година, е една од најстарите производни капацитети во Македонија. Во почетокот, сѐ до 1974 година, фабриката работела само со еден производен асортиман, мелен црвен пипер, што било доволно за да работи успешно цели 18 години. Проширувањето на производниот асортиман се случило во 1975 година, а со самото тоа почнал и континуираниот развој на оваа прехранбена индустрија, кој не запира ни денес. Прилепска „Витаминка“ од фабрика за производство на мелен црвен пипер прерасна во компанија која е лидер во прехранбената индустрија на македонскиот пазар. Со процес успешно завршен уште во 1999 година, „Витаминка“ е целосно приватизирана компанија. Денес компанијата има 576 вработени, од кои преку 90 се високообразовани стручни кадри, и располага со 19 производни линии или повеќе од 350 типови пакувања.
– Постоењето на пазарот цели 58 години не може да биде случајно, особено земајќи ги предвид променливите пазарни услови и големите бранувања што се случуваат во овој полувековен период. Вистината е дека во толку долг период бевме сведоци на многу структурни промени, почнувајќи со максимално отворање на пазарот, влегување на странските производи и експанзија на помали домашни производители. Сето тоа придонесе за расцепкување на пазарот, при што секој се бори на свој начин за своето место на полиците. За да се задржи, но и зголеми, присуството, неминовно е да се приспособувате на новите услови и барања. Сепак, основата на доброто работење е да создадете квалитетен производ, изработен од внимателно избрани состојки и правилно пласиран на пазарот. Придржувањето кон основните принципи на работа гарантира одличен пласман на пазарот и препознатливост на производот од самите купувачи – вели првиот човек на „Витаминка“, Сашо Наумоски.
За време на своето постоење, оваа фабрика се соочувала со многу проблеми, но сите ги има надминато успешно. Едно од поголемите негативни влијанија, секако, е економската криза, за која во „Витаминка“ нашле начин како успешно да ја преживеат и надживеат.
– Иако економската криза беше и сѐ уште е сериозна закана за многубројни македонски компании, негативните ефекти може да се надминат. Најдобриот начин за справување со економската криза е инвестиција и вложување во основната оперативност затоа што вистинската инвестиција секогаш се враќа со позитивен ефект. Последната наша инвестиција беше во унапредување и модернизирање на производната линија за чоколада. Оваа инвестиција придонесе за поголем квалитет на нашите чоколада, а, исто така, ќе го забрза и производниот процес. Тоа ќе нѐ направи поконкурентни на домашниот пазар, а, секако, е одлична стартна позиција и за пласирање на странскиот пазар – велат оттаму.
Присуството на производите на „Витаминка“ на странскиот пазар е сѐ поголемо и расте од ден на ден како резултат на нивната извозноориентирана стратегија.
– Моментално сме присутни во повеќе од 30 земји во Европа и во светот воопшто. Само на австралискиот континент производите на „Витаминка“ се достапни дури 25 години, што претставува наш личен куриозитет. Преку извозната програма моментално пласираме околу 45 проценти од своето годишно производство. Затоа што извозот претставува значаен дел од нашето работење, извозната стратегија е наш фокус и натаму, со проширување на производите присутни на странските пазари и со влегување на нови пазари – објаснува Наумоски.
Од „Витаминка“ оценуваат дека има разлика во работењето на микрониво и на макрониво, но таа разлика не е секогаш важна.
– „Витаминка“ не е само синоним за одличен квалитет, туку на нашиот пазар е и име за постојаност на квалитет, бројност на производи во многу различни сегменти, постојана комуникација со купувачите. Нашите производи се изработени од висококвалитетни состојки, и сето тоа е веќе дел од нашата историја и традиција како производен ентитет. Додека, пак, на макропазарите стартната позиција ни е сосема поинаква. Таму реномето и традицијата на „Витаминка“ не се познати категории и единственото и најсилно оружје со кое се бориме за простор се нашиот квалитет, позиционирањето и умешноста во комуницирањето на производот. Генералниот заклучок е дека на макрониво мора да се натпреварувате со домашните трговски марки, кои веќе имаат изградена препознатливост и длабоко се навлезени во свеста на купувачите. На некои пазари изборот на производ многу често е поврзан со националната свесност и патриотизам. Но, квалитетот се цени и бара секаде и секогаш – вели генералниот директор на оваа прилепска прехранбена индустрија, кој оваа позиција ја наследил од својот татко, со што фабриката доби нова енергија и полет за уште поуспешно грабење напред кон нови успеси. Го прашавме како успеа да ја продолжи традицијата на одлично работење и да го зачува моделот на добро и домаќинско работење.
– Традицијата на одлично работење ја продолжуваме преку придржување до одличната деловна стратегија, постигнување на зацртаните цели, работење со квалитетни соработници, следење на трендовите во потрошувачките навики, следење на добрата работна етика, создавање одлична работна атмосфера и почит меѓу вработените. Истите работи што биле практикувани и претходно. „Витаминка“ во секој аспект функционира како целина и затоа успехот е целосен и непроменлив – ни одговори Наумоски.
Освен што успешно работат сега, раководството на фабриката има големи планови и за во иднина.
– Измината година воведовме извесни промени кои очекуваме дека ќе дадат одличен резултат и ќе придонесат во исполнувањето на нашите планови. Покрај внатрешните промени во структурата, новата инвестиција во производството ќе ја унапреди производната технологија. Сето тоа ќе има свој позитивен одраз врз зголемувањето на производниот асортиман, квалитетот на производите, присуството на пазарот и експанзијата на пазарите, кои се дел од целите што си ги имаме поставено – најавуваат од „Витаминка“.
(Пишува: Александрија Стевковска
Текст објавен во 110. број на неделникот „Република“, 10.10.2014)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
