Кристијано Роналдо имаше спектакуларно враќање на „Олд трафорд“ и со решавачки гол, за победа на Реал Мадрид од 2-1, помогна во елиминацијата на неговиот поранешен клуб Манчестер јунајтед. „Кралевите“ од Мадрид со вкупен резултат од 3-2 се пласираа во четврт-финалето. Во следната фаза оди и Борусија Дортмунд откако убедливо ја заврши работата со Шахтјор Доњецк, славејќи со 3-0 на својот „Сигнал Идуна парк“.
Жозе Мурињо, стратегот на Реал Мадрид, најави дека целиот свет вечерва ќе биде со погледот кон „Театарот на соништата“ во Манчестер, а двата гиганти ја оправдаа довербата.
Во првото полувреме, гостите имаа среќа затоа што англискиот тим имаше повеќе од играта. Видиќ го погоди дирекот, а Диего Лопез беше извонреден и неколкупати со одлични интервенции спречуваше водство на Манчестер јунајтед.
Грешката на Рафаел Варан и несмасната интервенција, која заврши со автогол на Серхио Рамос во 48.минута, му донесоа огромна предност на домаќинот. Но, само девет минути подоцна и Нани несмасно реагираше, направи груб фаул над Арбелоа и доби црвен картон. Тоа се покажа како клучен момент на осминафиналното дерби во Лигата на шампионите.
Одличен потег направи и Мурињо, ставајќи го во игра Лука Модриќ. Хрватот возврати со фантастичен гол, од дваесетина метри во 66. минута. Погодок за најавните шпици и витален за враќањето на Реал во игра. Гостите притиснаа и само три минути подоцна, миленикот на навивачите на Манчестер јунајтед, Роналдо, со нов погодок направи комплетен пресврт.
Домаќините немаа веќе што да бранат, и со играч помалку тргнаа по подвиг и уште еден пресврт, но Лопез на голот на Реал беше маестрален. Ги одбрани ударите на Ван Перси и на Руни, па „белиот балет“ од Мадрид победнички ја заврши убавата претстава на „Олд трафорд“. Натпреварот беше јубилеен илјадити за Рајан Гигс, иконата на „црвените ѓаволи“.
szólj hozzá: Manchester United vs Real Madrid 1:2 HIGHLIGH
Во Дортмунд, фудбалерите на Борусија, го демолираа Шахтар Доњецк и лесно славеа со 3-0. Со вкупни 5-2, тие одат во четврт-финалето. Сантана и Геце со по еден погодок во првиот дел најавија неинтересно второ полувреме, а гостите ги докусури Блашчиковски, по катастрофалната грешка на голманот на Шахтар, Пјатов.
Денеска се играат уште два осминафинални реваншни дуели. Јувентус во Торино ќе стартува со предност од 3-0 против Селтик, а Пари Сен Жермен во Париз има почетни 2-1 против Валенсија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
