Самарас бара гласање за доверба на Владата

Грчкиот премиер Андонис Самарас денеска официјално поднесе барање за гласање доверба на Владата. Самарас поднесе писмено барање до парламентарниот спикер, Евангелос Мимаракис да побара гласање кое ќе се одржи в петок на полноќ. Дебатата ќе почне в среда.

Грчката коалициска влада има 154 пратеници, а за да ѝ биде изгласана доверба ѝ треба поддршка од само 50 отсто од оние пратеници кои ќе бидат присутни на гласањето. Девет пратеници на Златна зора се во притвор, што значи дека на коалицијата ѝ требаат само 146 гласови, кои најверојатно ќе ги добие.

Владини извори изминатиов викенд информираа дека Самарас и Венизелос се уверени оти ќе ги добијат сите 154 гласови од пратениците на Нова демократија и ПАСОК. Од страната на ПАСОК, единствениот сериозен сомнеж е за тоа како ќе гласа поранешниот лидер на партијата Јоргос Папандреу. Односите меѓу Венизелос и неговиот претходник се на многу ниско ниво и тие воопшто не комуницираат.

Партиски функционери изјавија дека одлуката да се побара гласање доверба на Владата е диктирана од потребата да се најде излез од притисоците со кои се соочува од страна на тројката меѓународни кредитори, народот, Сириза и луѓе внатре во Кабинетот. Според владини извори, гласањето доверба е неопходно затоа што на тој начин официјална Атина сака да покаже дека земјата има институционална стабилност.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.